محمد الصكر
هلك ياطير الولاية اكطعوا تغريب
وترسو الدنيه هلاهل
وجرح المعسر عله الغنوه يطيب
طير بجناحي بعد مامش غريب
جفوفنه تلاكن سوه ووجن مشاعل
وشفافنه تلاكن هله وطكن هلاهل
منهو اليكدر يطفي اجفوفنه الوجن مشاعل
ومنهو اليكدر يبوك الفرحه ياضي المعامل
وأنه ونته دفوف للفرحة الچبيرة ..
وهيوه ياركص السنابل
ابسچه وحده اچدامي واچدامك تطوف
ابغنوه وحده .. أشفافي وشفافك تطوف
ومهرة الما تصهل أبليل المكابر ..
تصهل أبملكه الجفوف
أشكد حلو ملكه الجفوف
* * *
أخذني بكل كتر بيه محنه وطيب
أخذني بنادم العشرين جرحي بلا شماته أيطيب
وحنه من طبع الشمس صاير طبعنه
نغبش ونصبغ سواد العين ونضوك تعبنه
عمال والدنيه عرفتنه
عمال والغبشه عشگتنه
وكل عصافير الفجر ألنه تغني
واحنه بالمعمل نغني
ماتعلمنه نبيعك يا وطن
ولاتعلمنه نجفن اجروحنه
نموت وكفه وأنت تدري الميت ألماله جفن
هم يعز روحه أعله أتراب الوطن ؟؟
إلك ياما كتبنه وسيرينه أبليل
ولك ياما تغاوينه وكطعنه الحيل
عراق الحب ياروحي أغنيلك ألف ياليل
أحبك ياعراق الماي .. مثل الشمس وبنادم
احبك ياعراق الحب وشريك برفيف الدم
مادام الشمس حره ومادام الحرف يلتم
ــــــــــــــــــــــــــ
الحلة / ناحية القاسم
