عبد الحسين ابوشبع
تعال اثنينه نبحـــث
موضــوعك وموضوعي
يو ألتزم مشروعك
لـــو تلتزم مشـــروعي
***
ابن هذا الوطــــــن إنت
حسـب ماتدعي وتشهد
وانه ابن الوطـن والناس
تعرف والـدي والجــد
وطنا يحــــــــتم اعلينا
تحمـــي ثروته والحد
نتــعاون بهـــذا الــــرأي
أنه وياك وانت ويـاي
شكلت بيها صحيحة هاي
ولك ميصير آنه احرس
وانته بسطحك تعوعــي
***
اول مرحلــة نبحث
ما اخفي عليك اســـرار
هدفنا نصفي تربتنا
مــن اذناب الاســتعمار
ذاك الوكت من نصبح صدك
من الصميم احـرار
ونبدي بمرحلة تصنيع
ومنخلي الاوقات تضيع
ومنخلي الدعاية تشيع
هذا الاخ ديمقراطي
وهذا كـــــافر شيوعـي
***
إحنا نريد الاستعمار
مـــا يدخــــــــل التريتــنا
ونحافظ على التربة
ومكاســب شرف ثورتنا
ومعامل بالبلاد تصير
وشــغيلتنه تشـوف الخير
وعلى خط مستقيم نسير
ميصير انته متنعم
وأنه مكــوّ خ بجـــوعي
***
أنا موحاسد النعمة
عـــــــوافي تأكـل لحالك
يكون اتصير إنساني
وتقــدر تعـــــب عمـالك
تشفوف أطفال هلُعمال
مـــثل ماتنظــر اطفالك
اطفالك تنعمـــــها
وتدرســــها وتعلمـــها
وذيج اطفال تحرمها
جوع وعره شأجمعلك
خاف اخطىء بمجموعي
***
عرفنا نحجي عن الحك
منلفف امـــــوال الناس
كلنا انريد نتعاون
كلنا للــوطن حــراس
مويوم الذي يولوك
تحطني بحجيك اعله الراس
ولمن تضبط حزامك
تدوس الناس بجدامــــك
اخذ تجربة من أيامك
ترد لضلوعك الرمية !!
لوهـــدفت بضلوعي
***
أتهمك وحده من اثنين
لو من الصفير تخاف
يولا غلــــب ومغالب
تلف وتدور مو انصاف
يو آلـــة للاستـــــعمار
ترسم خطط للأحلاف
عليك شيامر الســــيد
تكله نعـــم وتأيد
تره وهمان يعني
لا أطلس ولا سنتويعكس
يعكس نهج مطبوعي
***
نصيحة اخذ من عندي
أنــي اللي إلك انصح
العدو لوربحك دينار
مــن عندك ألف يربح
والتهريج والتشــــريد
وجـــــلاب الــذي تنبح
من اعداك ماتحميك
لوصـــار الحساب عليك
باجر عمك يجازيك
يكلك جيب يافوخك
واسمع دكة اجموعي
***
لا انت ولا غـــــيرك
يكدر يصــدها التيار
تقرير المصير يصير
حتما ً والشعوب أحرار
فشل عقل القديم الجان
يحكمها بحـديد ونار
ذاك العقل غيره صار
عقل الســلم والافكار
عقل السفن والاقمار
عقل الذرة والصاروخ
وين إنت يجرقوعي
***
