علي الملا الخزاعي
اصبر الروح بيش وانته بيه الروح
واذا تطلع اظلن بس جسد خالي
لكيتك من جنت مالاكي كل الناس
انته اول محب ونته الصرت تالي
يالكلك محبه وانته احن مخلوق
معقولة الحمامة اتصير كتالي
صح ماكو بجمالك انه ادري بهاي
وروجة رقتك ماكضهه كل جالي
حرام اعليك تزعل ونته تزعل ليش؟
اجيك انه اعتذر وبلا ذنب خالي
غالي وكلشي عندي وما اهدك دوم
وغالي وهسه احبك جي صرت غالي
احسك تختلف عن كل بقيت الناس
بعيوني اشوفك عالنجم عالي
واشوفن دمعتك ماجنهه تنزل ماي
ذهب تنزل دمعتك تجدح اتلالي
الك بستان عمري بكل ثمن مزروع
راضي بكل شي منك كلشي يحلالي
اجيك ومن ارد فارغ ارد للغير
وعنب بس اعله مودك تارس اسلالي
يمك انسه روحي ومن اكون وياك
وعلى فنجان شفتك تركع ادلالي
الواشي بلا بخت مرني وزعلك
واموت ولا اجرحنك وزعلك
حلو كلك على بعضك وزعلك
بحلاتك فدوه بس ارضى عليه
الحلاوه البيك يسمر من تمركم
وروحي اتذوب يمكم من تمركم
ادوخ امن ارد احسبك من تمر كم؟؟
واحد بس اشوفك تسعميه
