احمد الحسيني
أعيش بهجرك وبيه الربيع أيموت
وحرارة حزني تاكل كل معاني الفي
بس شمس الصحاري تمرني وبتموز
أتعثر بوجهك يابسه بلا مي
متنكر يمر جرحك لبس تابوت
بحفلة عيني يمكن لابس أرخص زي
ركص ركصة عجوز أتعدت السبعين
تصافح بالحضور وتغمزلهم كي
تجذب للنظر بس مو نظر للموت
ويكتبون عله جفني جان كائن حي
يصفن نبض كلبي وانه أحسب مات
قديم الكلب بعدك بالنبض يعتگ
شسولفلك لهفتي تمشت الحيطان
چم حايط يكزبر لو ردت أشهگ
شيعبره الشته ومرني بقلق مسجون
جهالة بنص حلم گالولة بويه الحگ
وأجتازيت بردك والثلج والخوف
وعبرني الدمع وجه البرد الأزرگ
تكسر جام شوگي ووكعت الالحان
وشفافي انچفت معزوفة ماتزهگ
ماطول عله بالي أنته اللحن مجرور
من حنجرتي ينزل بالخلگ يحرگ
أحبك من كلتها أنته عصرت دنياي
شبسرعة مسحتها ولحگت تعشگ
أنخلق ظل بخيالي يواسي بي عالصار
من باوع خيالك بي أثم يندك
يلهث صوتي من أتخيلك مريت
متحدب ضرير بنص برد يعرگ
چودر بالحنين البيه ألك تنور
يخبز ذكرياتي ويطعم ألشمات
تصوغ بطفل كلبك خوفي لعابات
برياض جفونه تكسر واهس الدمعات
ومينزلن يصعدن يم حلك الطيور
فوك عيوني أحسهن طارن بضحكات
وينك يالقديم ألبس غزل ألكاك
صفه بس الرثاء يمرجحك صفنات
