احمد الوائلي
رسالة من امي الى
اخي الشهيد … علي واخي الشهيد… حسن
ضحك وكتي اعلة جرحي بعيدك الفات
وجابيلي بدالك بيده دينار
بوكت جان الحبل مو للمراجيح
الك يم الحبل مرجوحه لو ثار
جرحك مثل بيت الطين مملوح
من جرحك ييمه الوادم تغار
رسمتك طاسه ماي ابنص الحبوب
وبيك شكثر شربت ماي زوار
جرحك عفته ذمة برية الناي
عودك مارقص بحضان الاوتار
عله باب البيت حسراتك تجاعيد
ماتدري بغيابك شيب الدار
صم اتراب بيد او ايد جكليت
وهلالك طفل وبصفك النار
بين هلال جرحك والمراجيح
فوك الكاع ظلت بس الاثار
على طوله وكف كبرك بالكبور
مثل النخلة وانته بكلبه جمار
بعيوني الك كل ساعة شكل لون
الشمس تمشي بكفاك وجهك انهار
طيفك باك من عيني التصاوير
دمك بالصور مايلزم حار
وحس طيفك يجني وبعدك ازغير
اشو يمه البعمرك كلهم اكبار
اتنفس هواك الخانكه الموت
وتوج غيرة هواك بريتي نار
وحط شفتي اعله كبرك وانته مدفون
ابوس بيك احس مابوس حجار
شهادة صف الاول لسه بالبيت
وعلامة من المعلم مال شطار
ولسه اذكر جبتلك جنطة بالدين!
بوكت جانت خوالك كلها تجار!
السوالف تعرض بزدومي سجين
وفز من الجرح والعبرة منشار
وهم مثلي انشلع كلبك بالكبور
هم تدفع ييمه الكبرك ايجار
على جرحي تمر من يسهر الليل
وچلبت بهواك وطيفك المار
وعيدك مارجع وهلالك انباع
وكبر جرحك شلبسه هدومك ازغار
