حسين جهيد الحافظ
حلوات الليالي بالامل ويّاك
إو كل ليلة التمر ترفه
إمعسرات إبجفاك أمسودنه إو كلفه
مر بيَّ حلم تلگاني إلك جنحين
أطيرن فوگ أطيح إشموع بالزفه
يا شعر المشط يستانس إبملگاه
إو يفرح من يشم زلفه
يا عفة بدو وإتباهي كل عفه
أيّام الخلگ تتنطرك ميلاد
وچفوف السَمَر بمحاضنك تغفه
يعيد إلما وصلك عيد
إجويريد يمَّك لو وصل يدفه
يربان السفينة إو بيدك الدفة
گليط إنته إو صدر ديوان
گليط إو بالحچي إمعدل
البحر لو شاف غيرك لازم السكان
يهيج إو داعتك يزعل
إبضوه إعيون يهون … إو كل صعب يسهل
يا چف اليلاوي الموت بالكلفات
وإلحچي الصدگ مدخل
الگمر من نشوة أفكارك بدر يكمل
روحي إلبيرغك چاكوچ
يدگ إو گلبي المنجل
حلم وإعيون هاي الناس …
كل الناس تتأمل
كحل دم الشهيد و شوفتك مرود بيه كل عين تتكحل
حلم هلبت وألف يا ريت واحد ليك يتوصل
شأوصف بيك كامل من مجاميعك
شيوعي إو طبعك إمكمل
إلك غنيت من زغري وإنته إبعمر الإتلاثين
بزنودي شلتك حرز وإبذمتي شلتك دين
لعيوني صرت الضوه وإلدربي صرت العين
ريّه إو حضنتك هوه .. ريَّعت بيك إسنين
باهيت بيك الوكت إو زامطته لنك زين
إو لنك أمل كل بشر شوباش الإمعرسين
يا عطر هيل إگهوه يا منبع الطيبين
ضحكة إعله شفة طفل يالشوفتك عيدين
إحبال المشانق تفتخر بسم أهلك الطيبين
إزواگه إلهه صار إو فخر دم الشيوعيين
كل هذا شدة ورد فل نرجس إو ياسمين
طرزهه خيط الشمس وأنجوم وإهلالين
إو صارت هدية وفه للعيد الثمانين
مبروك بويه إو ألف يالعمرك إثمانين
