احمد الحسيني
مشيت انت واجه يلطم بروحي الهور
موزَّر بالگصب والناي صوته التم
اصد ظهرك والگه جروح تسحل صوت
بسلاسل عشرتك ضحكاتي تنزف دم
بوتر ذاكرتك اعزف نبض گلبي الضاع
بمتاهة نزوتك دوزن جروحك سم
اضحك عيش جرب ضوگ ليل ارتاح
اكل فراگ واشبع طش عليه الهم
احتوي غيري مثل ام طشرت السنين
كبرت بس ابنها البار بيها يلم
بسمفونيتك اخلق روح للتمثال
اسولف والخلايا لاي جسم ترهم
دمعتي تعاكست وي جاذبية الكون
شحجي وليل دمعي بقصرك تهدم
ارفع راسي وابجي وتطفر الدمعات
تمطر ع الغيوم وفوگ منها تهم
صوتك خدش لون المستحى بملكاك
قلق يمطر عليه وبيك مطرت چم!!!
ضحكة وعافية وبوسات گــد الماي
وانه وجه الزوابع يطلع من الفم
اشتعل كوخ امنياتي بكلمة اترجاك
سوي الي تريده وبيه لاتهتم
بياض بروحي يزحف چـان فوگـ الكاع
وعلى فرگاك لون جدامي يتفحم
امر بشجرة واسحب لونها بطاريك
لون الطعنة يكشخ بيها يتهندم
شمع طولك يكطر فوك ناري طيوف
يذوب الليل بيها وبيه تبدي تضم
شعور آخر حضن لحديثة سمعت صوت
رجلها تأسر وبالحسرة اجت تهضم
آنه بوجنتك سولفت للفراش
والخفاش اجاني بخنجرك سلّم
على وجهك شفت شگة هدم ايتام
بشته مزاعل شمس وبيوم هم اظلم
غيري شعنده وبخاطرك ظل مرتاح
وأنة الچانت ضحكتي لدمعتك بلسم
هم عنده خلگ صورة بمتاحف ليل
ظلت باقية وعميان الترجم
يملك واهس مراية بقصر مهجور
تعكس بالاشباح وبالحزن ترسم
آنه بنص عواصف اشم عطرك روح
وانت تبيع صدري وبالهجر تشتم
