عيني من البعد تخنگهة صرخات
وصفنات النظر تصبح مواويل
وحروف الغزل بشفاه الاطفال
على رگبتك ملك صارت زناجيل
معاني اتكاثرن بعيونك ايام
والبؤبؤ يضم صورة قناديل
يالتملك رمش غرگنة احساس
اذا برمشك ينام ويحلم الليل
شفت طولك شعر خطواتك اوزان
وما أكتب لأن خصرك اقاويل
وين تروح شخصك كاتب البال
طلع معلوم وحدة بنص مجاهيل
ابوگ اليوم يختل يمك اليوم
يخلص بس دمع يخلص تواسيل
تمر عالدار فرحة وخلفك العيد
ومحاسن هالبشر من خدك اتسيل
ما تتعب لأن تكضيهة سكتات
يهل حيلك سوالف هدت الحيل
تتريگ فرح تتغده بسمات
تتعشة الترف متغطي بحساس
كتبت اسمك بماي ودرته بسكوت
فضحني وصاح بسمك رأسا الكاس
يهل بحروف اسمك تگعد الروح
ماتقفل جفن يحتلهه وسواس
ردت وجهك احبسه بعقلي وأرتاح
طلع وجهك ثگيل ودنگ الراس
أغاني تكورت يم خدك اتصيح
على الوجنات تركص كومة أعراس
على متونك تطل ضحكات الاشجار
على فيك وكف متفطر الفاس
على الحاجب شكل ماشالته عيون
ومثل وجهك شكل ماشافته الناس
