ادهم عادل
شما اكتب قصايد نابعة من الروح
وبعد بيه وجع بالشعر ما مگيول
وحك كل دمعة سمره مرافگه الجناز
ووحك كاع النجف من تشتهي المكتول
انه ملبس دموعي بتوت للمعدان
وحسراتي نثايه ولابسات حجول
شما گول المصايب كبرن اعلى البال
ارد واصفن عليهن بعد بيهن طول
انه جنازه شعر بشفايف الخرسان
وانه شوغة هزيمة بطارف المشلول
يموت البس تصد للعنده سبع اطفال
خايف ما تصدلي وخاف عمري يطول
اشتهيت اشتم عرك من كصة الدفان
ونويت انشد نعش فوك الجتف محمول
طلگت الكصيبة التنظفر بالطين
ومشيت انحر الصحره واظفر العاكول
يشتمني الحزن لو روحي اضمها بطيف
فلاح ويشم عطاب بالمحصول
احب ابچي بستر بس المصيبة شلون
انه همومي غجر والدمع دك طبول
تره الضحكة الغميجه تريد راحة بال
ميجودر ضحك بشفايف المذلول
عفت شهكة اللهفه بختلة العرسان
وطلعت اتمشه شهكه برية المذلول
انه شايل وجه ميلوك للبطران
ويكعد للثكاله فصال عرض وطول
يالماشي اعلى كبرك اخذ عمري وياك
تره بذمتك شبابي العشته ظل مشكول
ظل واكف بعيد وكلي موتك ذاك
واكلهم اني جيت وانته ما مسؤول
