علي الشباني
سولِف..
سولف الشرجي لبس روحي ومشه
سولف وغيمك لبس روحي ومشه
جاس البحر گلبي ومشه
جاس الهوا.. جاس الدمع
جاس الليالي الموحشة
سولف نزع ثوبه الشجر
سولف لبس روحه البحر
سولف ترس روحي قهر..
روحي قهر
روحي قهر
وإنت حبيبي الماي
بس يمته تفك باب النهر
چم باب..
كل خطوة قفل.. چم باب
يا ليل السوالف والعذاب
چم باب، بالوحشه إلك.. جم باب
غريب وبالمدينة تروح.. روحي وما ترد وياي
سولف ما ترد وياي
إنت “بكثر الهوا والماي”
حبيبي وما ترد وياي
مو ماتت مدينتنا قهر
بس يمته تفك باب النهر
نهر
نهر
نخله حزينه هناك واگف بس إلك..
مرْ يا نهر
وأصبر على جرفك عطش
وأعبر على مايك عطش
وأصعد مطر
مر
مر
مر يا نهر.
