أسولف بيك..أسولف ردت أسولف بيك

بلكت تستحي امن اعتاب سالفتي 

عاندت الوهم كاسرت ماي ابنار

أسولف عالجمر وتبخّرت قصتي

لا ميّت وريدن فاتحه اعله المات

ولا ناصب على العدلين فاتحتي

أحسّن بي ثكل وال هّذا أدنك الراس

من كد الحياء الشايله ابكصتي

ماساوم أبد عالجوهره الويّاي

لو أعرف حياتي بثمن جوهرتي

هيج اتعلّمت من شفت بطن الطير

باضت عالوتد من حطّت ابختي

ياخيط الشمع لاتكبر اعله الناس

وخيطك مشتعل من نار منقلتي

يطفّك الهوى وبس تهب نسمة ريح

واحذر من هواي وزعل عاصفتي

يالميّت چنت لاتنسه نفخ الصور

من كد مانفختك ورّمت شفتي

لو نفرض كمر بعض العيون تكول

بعيون البعض موبيك مشكلتي

مو حته الكمر ربّك منازل كال

بيك اشكال شرعي وردت منزلتي

الگالو عيد باجر من لگوك هلال

لاتفطر عليك وصومها بذمتي

دلّيتك الشجرة وسلّه كتلك هاي

حلگك بالغصن وجفوفك ابسلتي

من كلّك خيالك ينحسبلك طول

وابگصرك فشل كل طول قافلتي

آني الشفته منّك شافه عود بنار

ولاتغفرلك الزلاّت عاطفتي

يخنجر لوحجيت بيا وجه للناس

والشاهد عليك السان خاصرتي