المرحوم غني محسن البهادلي
مســـــافر گضيت العمر
ورقه على چتف الريح
كل شهگه صارت جنح
يم عمري خاف تطيح
ياروحي وحشه الدرب
وبخطوتج سمي
انتي عليج الجرح
وآنه علي همي
شفت الونين برمح
يعبر نهر دمي
وما ادري عيني البچت
لو غيمة اجت يمي
كل ما اگول عبرت
يتبعني حبل الصوت
حسبالي من ابتعد
كل ذكرياتي تموت
ياروحي ظل بس درب
خلنه بعمانه نفوت
لو هيه خطوه امل
لو هي بحضن تابوت
مسافر واخذني التعب
والغربه صارت طبع
يالوحشتك من تمر
سفرة ونين بضلع
مرات احسك عطش
من روحي راح انشلع
ليلك تبعني برمح
واحتمي بظهر الشمع
كل الليالي انگضت
بس ليلك اشكبره
ياكلبي صار الدمع
مرساة للعبره
دورلي يمك صبر
گلبي خلص صبره
ومو ماي اعبره ابلم
بس ليل شيعبره
امشي ومتاعي جرح
وبلا امل لا دوه
وخطواتي صارت جنح
وامشي على درب الهوه
غشاني هذا الدرب
وصفلي درب الضوه
شمدريني ظهر الشمع
راكب عليه الهوه
