احمد الحسيني
الى روح الانسان محمد بو عزيزي
شمعة روحك
صبغت ليل بلون النور
على وجه الهندس تتحفه وبجدام النجمات اتدور
صوتك يزحف بأذن الاطرش
ويطش بنغماته الهور
من روحك بيكاسو استوحى
كل فكرة لوحة من عصور
روحك تتمشى عله الصخرة
وصرخة (لا) من عدها تثور
بجيوب الحرمان تناثر شهگة عوز بماي تفور
شلت العازة ورشيت من طحين الحسرة
وحطيت الخمرة من سنينك تعجن موتك وبجلدك وج التنور
التنور
تغريد وسندانة ونبتة
كسرن مطرقة المأثور
شعّت فوك جبين السكتة صرخة لاااااا
وبين اصوات الدنية تمشّت
چنها حضارة من البلور
انت قصيدة ومن القيك
لازم البس تسع بحور
شيخلصك يابيت يلــخصك ..
معرض لوحات بأيامك بيهن خطيت الدستور
البند الاول :
الانسان …. غنوة وردة ولابد عالصبيرة تثور
البند الثاني: الدمعات الوگــعن من جفون الفقره تصير گبور
ندفن بيهن اخر كسره
بآخر شيلة من الناعور
البند الثالث:
نزرع شجرة من الحرية بنص الدولة
وبالاغصان نشد حبال
وتقسّم شجرتنا عدالة
نصها مراجيح وضحكات
ونص الثاني كله مشانق
بيها نعلگ الدكتاتور
هذا ربيع احساسك سيّر فوگ اوطان الغربة جسور
متحدب موتك من عبروا
واخذوا من جثتك اعمار لوطنيتهم
هاي الماتت من دهور
شچنت تفكر ؟
بالك وين وانت تحرر وگت العصرية بنص شعبك
ماخفت غروب يمر بيدك ويشد بصفگاتك سور؟
المثلك دوزن نبضاته بگلب حسين
ودندن روحه بنص كل عاطل عن الدنيا
وعن الشوگ
بسمفونيتك رديت لكل عاشگ حبه الظل مهجور
صوتك شگ سد الحرية
وانهارت صفنات الظالم يم جروفك
فتحن خندق يتقمص لقطة خفاش
وليل يشنقه بدم الشهداء المهدور
سرفنت عيونك للاعمى وخطله قصيدة
وكفيت ردان الاحساس لأبسط شاعر
حتى يشوف ومن قافيتك تمشي نذور
وفيت وكفيت بذاتك يالوحة تنگع تاريخ .. وماتتكرر ..
كشفت شيضم المستور
روحك فوگ گلوب العالم
طارت فختاية محناية بچف اطفال أنباگت ضحكتهم بالعيد
وصاحوا يمحمد معذووووور
