رفعت الصافي
ابمزاد اطفوف عرضوا رﮔـَبتي الشمات
وانت اول سهم وﮔـع على المنحر
سهمك من اجاني عيونه مشدودات
ﮔام شلون الاعمى بكل كتر يعثر
حتى بصورتك وجهك ثـﮔل وياي
بحيث امنرد اشيل الصورة ما اﮔدر
اتلمستك وشفتك بالعيون ادنان
جاملتك وﮔـَتلك تشبه العنبر
انته اربات اللطم وموّداعك عاشور
وصدري اعله الـﭽفوف بروحتك ينشر
ارجع حضّرتلك واهس ام عريس
افصل ارويحتي الكل خطوة الك معبر
مثل الجاهل اركض لون عطرك فات
حسرة بـﮔلبي ظلت رد اريد اكبر
دمعي اعله الشمس شريته بس مافاد
الشمس عرﮔت وشـﮔت ثوبهه امن الحر
عثرة ابابكم ظليت للرجلين
وبدمي انصبغ بس ﮔلت لازنجر
امروره بعيني احس ﭽـي ماضـﮔت ملـﮔـاك
لذلك شحطة عندي اتصير بالمنظر
ماضيعك لوّنك ضعت شعره ابليل
ابيّت الليل اذا ما نيتك تظهر
اميّزك لوتصير براس نوّرس شيب
انه مفّلس اسنينك من ﭽنت بالذر
