فهيم عيسى السليم
داويها يابن الوطن داويها
وإلزَمْها بسنونك ولا تأذيها
ساويها وِخِذْ من (الزعيم) إدروسْ
ومن كل شهيد ومتعذّب ومحبوسْ
وخذ عزّ العراق الشرف والناموسْ
إنت إزرَعِتْ وإتعَبِتْ بلكي إتْحَصِدْ تاليها
داريها يابن الوطن داريها
وإلزمها بسنونك ولا تطّيها
داويها يابن الوطن وإﮔلبْ ﭽَنبر الخِرزاتْ
بياعة ديانة وللدَجَلْ أسطة وسبع خلفاتْ
تَرَه إحنا الوطن وصويحبْ أبد ماماتْ
والبيرغ أبد مرفوع والمبدأ يظل حاميها
أرض الوطن مُهْجِتَكْ وإنت تِظَلْ فاديها
داويها ياابن الوطن داويها
داويها يابن الوطن وإختار اﻟﻤِﺴِج والهيلْ
وإنتخب ريحه هلي يحرسها نجم إذويلْ
(ﻴﮔضن ورِدْ يا ديرتي)صاح القطار بليلْ
طول العمر ننتظر بلكي يجينا الريلْ
ويجيب شدّة ربعْ تحفظها وتداريها
داويها يابن الوطن داويها
إنت ياخويه الجُرُف وإنت زرع شاطيها
