مالك السلطاني
لايطب ابينه الماضايگ ادموع الحبيب
العشرة حرمت.. وجف الموادع غريب!!
خير خو مابيك شي…
استهلكت عيني بغيابك
والحلم يابس وصلهه وكطرة ماكو بمستحاته
آه لوتدري بحسرتي ..
حسرة المطلوب والديان واكفله بلهاته!!
كلب ادموعي اعله كيفك تلكه بيهن
شوغة ام اكبالهه يزفون مرت وليدهه الماصار له اكثر من شهر دورة وفاته!
بين بروحي النشاز ..
وكمت الفلفهه بصورك خاطر استر عيبهه
هذا حالي وداعتك . حال العجوز
التشتهي زيارة ا(لشريفه)وكروه ماكو بجيبهه
بسمرت روحي اعله آخر شجرة خطينه بظهرهه
فلان وفلان ونزل غيم الله وقع فوكهه.. شلون ذكرى
بيهه خفنه من الهوه ليبوكهه!
بيهه حلفنه الندى بكل الخضار وذمته شكلناهه خاف يضوكهه!!
جنت كلما انوي اعوفك ..
اعثر بريحة قميصك وارجع بلايه عذر
كمت اناغي بصورتك حتى بكفاهه ودمعت من كل كتر
شفافي عاجر
تحلم اتناغي ابتسامة وتشبك سنوني الهضيمه وانمرد
يابرد ياليلة من ليلة جهنم يابرد!….
ورحت ادورك جانت الدنيه برد
والكاع صحره بعيني جانت رغم بيهه شكد ورد!!
وظلي جان وياي يمشي
وصدفة ماحس لن وكف ظلي ومشيت وصاحلي ارجع
هنا أشم ريحه عشكنه سنين ضاربته الشمس
هنا مسيت العافية البيهه كعدنه وبيهه سولفنه اعله موضوع العرس
امي ماتعرفني عكبك.!
من اطب للبيت تسأل هذا المدولب منو ياهضيمه العشرة تاهت بيد وادم ماتعرف الحب شنو!!!!
