ثامر المالكي
اعدن بالربع .. بس اغلط ابعدي
واغربلهم واظلن بس انه الوحدي
واقدمهم عليه .. وانه ارد اسنين
واصيرن ضدي انه اويه الوكف ضدي
ومن دنيانه كامت غلط تمشي اوياي
اول ما طعني اللابد ابسدي
انه احزام الظهر .. للصاحب ابكل ضيج
اشد ظهره .. ويكوم .. ويطعن ابشدي
وانه اعذوبة البصرة .. وصفنة السياب
وانه غيرة الهور وفزعت البردي
اعلمهم عمر .. وانطيهم انه ادروس
واعلمهم يجي ابمعلومته ايجدي
وبعدنه ابدرس الاول والدروس هواي
كام اوصار كبلي وكلي ظل بعدي
بعدك ما تفرزن دار من داران
يالمالك بداية اشلون وك تبدي
صرتلك نهر خوه .. امحمل انه اورود
ليش اتجيب شوك وتزرع ابوردي؟!
انه بحر الوفه .. وامواج تتله امواج
وانه انطيك ماي ودومك اتبدي
ولو .. طبعي الوفه .. بس بحري من يغتاظ
يغرك حوت يونس من اهد سدي
اعرف وين حدك .. ولو حد اوهام
يالمالك كيان .. استوطنت عندي
انه دولة شعر .. واحدودي بس احساس
ومن شط العرب انه انرسم حدي
