صفاء الصمت
چي عراقي ودومي شامخ
عل الجبل شالوا حقد
وچي عراقي زرعوا بكل دربي شوك
ما دروا يم دجلة الخير البساتين اعلى طول الدرب منثورة ورد
وبفيها حلمان الامل
يعني وبكل الوضوح بگاعي ميعيش الاسل
وچي عراقي من وكت رادوني اموت
وچي عراقي راح اعيشن غصبن اعلى الماتوا بعازة ضمير
بدليل اطلع بيوم الخميس وشوف چم عرس بضفاير دجلة
باتن للصبح فوك الحرير
بدليل عدنه كومة اشكد حمام اهناك غافي اعلى المناير
بكد قصايد بدر ذيچ
بكثر مابعتوا ضماير
روح عاين ماي دجلة النايم بحضن الفرات الهسه يم كرمة علي
وروح شوف اطفال عدنه التضحك بوجه القنابل چي عليها اضيوف جايه
اشلون تطرد ضيف اجاها اعيون عدهم تستحي
وروح شوف الله واكبر راوية بدم الشهيد
وچي شريــف
ودمه طاهر خضرة تبقى اشما يمر بيها الخريف
وروح شوف عدنه جلمة ياحسين اكبالها امحدبه السيوف
وروح شوف وروح شوف
ولاتگلي ايتام عدكم عدنه صح ايتام لكن منهم ايغار الورد
مادريت عدنه كافل لليتيم الكعبة يم راسه تطوف
وصح كبر جرح العراق وبعد هم اكبر كبر
بس شفه…..والله شفه لان شفت امي بخيوط الشيله گامت تسلت وتلضم ابر
وعمت عين الجرح لومايشفه اذا شيله اصيلة البي تروف
روح شوف طاب جرح الوطن والله وبعد ماتقوه الظروف
وروح شوف موطني اترددها كل يوم النوارس عل الجروف
قسم يم دجلة تغني وقسم بعيون الفرات
بدليل روح عاين حمورابي بكل مشاعر مستعد كضه الحياة
وانت حقك لو علي تحقد طبيعي منين لك مثلي وطن
اني بس أ ((باء ))بغداد اكتب اكضيت العمر
وانت كل احروف مدنك مايكملك شطر
انت صح عندك بناية الناطحت بيه السحاب
وانه صح عندي الصريفه …….بس شريفة
لملمت عوز الليالي وفصلته عليه حجاب
انت ذاك اليوم صاير وانه صاير كبل ليصير التراب
نقطة البيه بدينه هواي عن عينك بعيدة
روح شوف الشاه بندر بيها كل صورة قصيدة
وكل قصيدة مطرزه بطيب الشلب
ومن يطرهَ غروب شوك تروح تتمشه اعله چف المتنبي
وبيه يتذكر صباه وبيه يقره بطور شعبي بلهجة وليد الجنوب
ويسلطن الهور اعله صوته وينطرب
ويظل يغني ياكصب …ياكصب
غير هذا الوطن احذر لاتحب
