سلوان المحمداوي
حطني ابال كل لحظه العشتهه وياك
وشخبط ذكرياتي بحايط النسيان
وارجع لم حچينه الطلع مدري منين
سد باب السوالف واستر الحيطان
قلق ليلي السهرته وعشگ عمري الفات
لحد هسه وضحكتك عالجفن سهران
ذكرتك والحلم غمض اعيونه وفات
خطف من مستحاي امدنك وخجلان
ولگيتك من شفتني وچنت ماملهوف
رغم جيتك ضوه لرية صبح غركان
ملامح غيرك امبينات كلش بيك
من لاگيتني عبالي غير انسان
عليه ايامي دارت من درت مكفاك
ودمعة روحتك ما كفه ليهه اردان
رحت واترف زعل بوداعك اشتميت
ريحه ملكه بي ما شامهه الزعلان
تلكيته ابخجل .. وابنكلة الخطوات ؟
شلت دربي اعله چتف الجدم شي تعبان
الصدك محتاجلك وبعمري مامحتاج
قدر حاجتي ابطيبة كلب والسان
غرك واهسك واستفحلت عالروح
وصبح كل ما املكه امن العتب ذبلان
رش ماي الموادع واسگي بيه الشوك
انه شجرة هوه وشهكاتي بيهه اغصان
خريفك مر علي واتساقطت الايام
وبقه نص عشگ بيه لجيتك عطشان
خلص شوفه ابظهر خطوات درب اجفاك
غلط .. ولخاطرك كلت الك ما غلطان
شرني ابحبل هجرك نشف الكلمات
تنكط احروفهن صارت صدى ابحرمان
سولفلي اعله هسه الماضي نسمه ابريح
يهمني الجاي كله وما يهمني الچان
هز چفني اعله كيفك لان طيفك بي
ثكل من حمل طيفك مو لان نعسان
يبو ضحكة املاكه وبالكفه تابوت
وجهك والكفه چن عيد وي دفان
زرعت بيه امل .. حطم اماني هواي
كلبك فاتحه بس قافل البيبان
دورلك عذر تقنعني بي وارتاح
اثر شوكك امبين بالوجه نيشان
ردلي لخاطرك ولخاطر الحبوك
قبلي .. ولاتشد هجرك ابجرحي اعنان
يل ابرد من اشوفك رغم حر الشوك
واتدفه ابضحكتك لو چنت بردان
احلفك بالثواني البيهه چنت وياي
هم تشتاكلي .. ابلحظاتي هم حلمان
اذا ما ناسي ردلي .. واذا ناسي الشوك
شخبط ذكرياتي بحايط النسيان
وارجع لما حچينه الطلع مدري منين
سد باب السوالف واستر الحيطان
