سلوان الفضلي
المنيه التبعد أتمشالهه
مثل خطاري وعلي اتحفالهه
الجايني من الباب افكله بروحي باب
وما يطب الجايني من أذيالهه
انه بعيوني الحرب لعبة جهال
والسواتر غيري مايحلالهه
الماعرف ميداني لا يگرب عليه
لذة الهوسه بعزم مهوالهه
حتى ساعة موتي اخليهه برضاي
ساعه ما تعجبني أكسر ميالهه
ميزت صوت الدمع بين الرصاص
انه أشيب المگبره من انعى لهه
موعدي وي التفگه مو موعد قتال
بيه لهفه عليهه من ادنالهه
چني أجيس بولفي مو جيس الزناد
ويه كل چيله بدفو اتغنالهه
گاعي ما تستقبل ألماعده دين
الگاع تضحك من تطب ارجالهه
كشخة البيريه مثل اعگال ابوي
المضايف تنعرف بدلالهه
الماعرف حيدر چذب يبقاله صيت
المهرة تعثر لو عثر خيالهه
الفارس اليعرف علي يفرزن هواه
يذبح الغيره الخطت چتالهه
الورده من اتصافح اچفوف الخريف
الصوچ مو بالغيمه هيه شمالهه؟
الوادم ألماعدهه غيره اعل العراق
منين له الذمه .. النعش يبرالهه
الوادم التستبرد بحضن الحبيب
انه أشوف الگبر حيل ادفالهه
