نوفل الصافي
اخاف من عندي اخاف
وخاف ما اگلك
اخاف نظل نخاف!
وبين اخاف نظل نخاف
يزغر براسي السؤال
وتكبر الليش ابلادي
وره حايط احتجاج
اگبال شارع من اماني وحلم زيبگ بين اديه
حلم زيبگ انوب يركض عاليمين
والعراق امبيت بجف اليسار
ونوب يركض عاليسار والعراق مچتف ابيت اليمين
ومدري ياهو يصيح بات في عراقك ياحسين؟
انه رايد رب عراقي
رب عراقي يحبني حيل
رب عراقي وياي يلعب مثل مايلعب علي وي اليتامه
رب عراقي اله بكل شارع علامة
طفل يحضنله حمامة
شفه مليانه ابتسامة
رب عراقي يترس جيوب الفقير وكلبه عالمحروم جامة
انا اريدن رب عراقي ينزل بقرآن شعبي!
ينقره بطور الونين
طور اهلنه يداوي جرحي
لان قرآن الفصيح من قرأ طور الحجاز اتأول وافتى……..
وانه ماجايب جديد
الك رب والي رب
والمثل واضح صريح
ارد اعيش
لا اصير بيوم سياف الرشيد وكافي امثل بعد عبد الله الذبيح
ارد اعيش
وابني بعيوني مدارس للزغار الكبرت ابستان خوف
وارد اغني.للحبيبة.حاسبينك نعدنه
عالحواجب يلعب الشعر الحرير
وعالشواطي شلون تتلاكه الچفوف
ارد اغني بلايه اه بلايه ليش بلايه اوف
وارد اغني للحبيبة ارد اغني
وشلون اغني؟
للحبيبة التفرز البيكي سي من الصوت عن السننوف
الخوف يعدي
وللفرح بيبان عشرة منين ما ردنه نفوت
ننحصد بالاربعاء نخضر براس الخميس
ونترس الشارع لعب
ونكلب الدنيه هلاهل من تمر زفة شلب
ذيج بحضان التريده ذاك عاشك من زمان .هذا يتمرن يحب
ذوله احنه
ما نطيح
فراش مانرهم نصير
غطه عشنه اعمارنه
نبلط دروب الجفن للاتي من اعمارنه
نعيش كعبه يطوف بينه العاشك نچمله ذنبه
ونرسم الدنيه فراشات وضوه نكطف محبة
انفلش التابوت من اعتابنه
ذوله احنه.مانطيح
شما شربنه البحر بعده الروج عالي مانقص
وكش ملك بين قراصة ضفيرة بلبل وشفة فراشة
وبين سيف وسوط بيبان القفص
التحدي قائم بهذي الحياة
وحاضرين شوكت مادك الجرس
والفرص كلهه متاحة للجميع واحنه قناصة فرص
