هاشم العربي
أذن للفرح وأگطع صلاة الخوف
وشهر المشتهه شما راوغك صومه
ولاترسم سهم وتگول الي چتال
طيره أعله الشجر شتخوف البومه
حد الصور لو ينغك عليه اغراب
ماكول الطيور السود ميشومه
بسامير الأمان بجيبي مجتوفات
خلها الدنيه تصبح كلها ملغومه
ياما فتحت بيباني وكت الريح
ودون الثام اعرض وجهي لسمومه
ويتكسر على خدودي البرد والكيض
ويكت الوزه اشما كتت اغيومه
انه لابس كرامة ومو ورق بالريح
واليلبس كرامة ايجدن اهدومه
ولو دوم الخريف معشعش ابممشاي
ومضبضب ربيعي او قصر ازهاره
وورق عكازتي وفالت رسنها الريح
وساعه وينكطع خيطج يطياره
بيه الشوك شفه من المرار اتصيح
مل فانوس خلكي وخنفست ناره
وفحط غصن الصبر كل ساعه اكولن طاح
واهو الشايل بكايه الدنيه بأكتاره
وبده ينث بالحزن فوك الشجر والروس
ثلج تالي العمر ويصيحن اسراره
الحلم يندب على الاطلال واويلاه
وين الچان شجره واصبح انشاره
وبديت ابروحي اشكن واذبل بملكاك
وانته اللي تورد ساعة اوداعي
دبسك ياكلب سميته واحة شوك
لا ماجازي فيضه لحد الانباعي
ولاتزرع امان بكل صديج ابساع
لو شفته اعله حكك شمر ايداعي
وعاين للربابه شماخذه من الشاة
وعاين بيش بطن فروته الراعي
وانه ادريها من الاول ناحره الصعبات
حظي بظهر وكحه براسها اسويده
من اعطش يصير النهر عني ابعيد
وبصفي الجرف لو جنت ماريده
وصرت حدر العثك شو بس المحشفات
وشليلي انترس والرايجه ابعيده
وانه ادري النصيب يلوح ناس وناس
والمايل نصيبه الاوف شتفيده
بيهم بالحلك ينكشهه منه اغراب
بيهم نايم وتتسلكط ابيده
وعرفته من اول المركاض ماشة نار
حركوني اعله شانه المحترك بيه
صديجي الجنت احسبه من الوكت ناطور
ومن صار الفجر خاوه الحراميه
تعنيته نهر وانه بظمه وهلكان
بدى اكبال عيني اعله الرمل ميه
وشجره اتصوريته ومن لفاني الكيض
لم اغصانه عني وماكسر فيه
ومن ثارن تركني وكال للشمات
عساها..بصاحبي
الجيلات ……………….موبيه
