حاتم الهاشمي
لتگلي أنتخب وتستجدي مني الصوت
مو للبيع صوتي وصـــــــعب ترشيني
ولاترفع صور وتوسـخ الحيـــــــطان
شعاراتك أبد ماعـــــاد تغــــــــــريني
مو كافي ……..كشفتك بين المســتور
لتحاول بعد ……..هيهات تشــــريني
ما انطيك صوتي… ولاتظن اشريك
يلــــناسي الوطـــــــن وسنين ناسيني
وآنا شنهو ألجنيته من أنتخــاب الفات
ويا مكسب أليه تحسبه دليني لتگلي أنتخب…… ماراح اعيد الراح
وآنا الشفته بسببكم والله …….يكفيني
شفت آني المذلة وماتركنـــــي العوز
أجيبك للحكم وأدري أنت تاذيني
مو كافي چذب ملينة منك روح
جمر ذيچ غلطتي لهســه يچويـــــــني
ملينا الوعود وچلمـــة أني أنطيك
من أيدك ذهب ماريد تنطـــــــــــيني
گلت أبني واعمــــر وأزرع الگيعان
وصار سنين أتاني وتنطرك عيـــني
ما أنطيك صوتي ولاتظن أشريــك
يلناسي الوطن وسنين ناسيـــــــــني
أريد أني أنتخب طيب شريف يكون
والشاري الوطن معناهــــه شاريني
مو لازم گرايب أو صــــديق يكون
ولا حب العشيرة ألـــنوب يعــميني
أنتخب الشريف بشرط صافي يكون
مثل ماي الفرات ألدوم يرويــــــني
ومتهمني المذاهب مايهمـــني منين
المهم عندي عراقي وهـــذا يكفيني
من أهل الرمادي من النجف والكوت
من كركوك كردي المهم يحمـيني
غلطت مرة وبعد هيهات اغلط بيك
وعلى رگبة اطفالي أحط سچيني
أل يحب الوطن من عندي ياخذ صوت
المهم يرضي الوطن مو مهم يرضيني
وأبو الايد النظيفة بزوده ياخذ صوت
مايحتاج أبد حــــــــملة ويوصــــيني
والچفه وسخ يحــــرم عليه الصوت
أموت من العطش ما اريده يسگيني
يا ابن العراق بذمة انطي الصوت
ولاتســـــاوم أبـــــد لتخالف الدين
