علي كاظم الصبيحاوي
مدلي جفوفك اشرب ماي
ومدلي عيونك امشي وياي
سولفلي اعله هونك ليل اريد اسمع سوالف ناي
يا هيبة عرس ومگابله الزافوف
يترجية كحيله ودغدغتها زلوف
يا سعفة حضن مر بيه عوزي فياي
عندي احساس…. مامش ناس
من اول وكت ولگاك لاخر ساعة الوهواس
جمارك ضحك ينشاف طم سوالفك ينباس
اصير بخاطرك ناعور بس كونك نهر ينجاس
عطشانك ملامح شوگ
شايلك حضن للضوگ
يا طيرة عشگ لطير افييلك عشوش الراس
اغيملك ندى وملهوف بين شفايفك ينداس
غنيلي وتمايل طول خدر ارويحتي امنلساس
عله جتافك يلولي الليل
رمش عينك يعادل ميل
عطر خدك يفشل الهيل
حجل برجولك النجمات من تخطف بروحي اجراس
يا اول نفس سكران طب ارويحتي بلا كاس
لملمتك غصن بي طوگ ومهدل الگصايب ياس
قريتك وشتهيك ماي
يا رگضة حلاة صباي
يا اول جنح بالريح خدرلي اعله شمسه فياي
اريدنك نبض بي روح من يعزف تهيم اعضاي
مدلي سوالفك حنيت
راح انشر جفوفي اعلوگ
وتانيك بنفس مخنوگ
وصيحلي اعله هونك جاي
