ناظر الخطاط
مااسولف بعد بعيــوني ويـــــــــــــاك وشلت سيف العــــــــمه اعله عيوني سليت
وربطت البيت كوه ويه الجــــــــوارين خــــــــافن من تفوت يلحـــــــــكك البيت
لأن ادري يتســـــــودن لمن تفــــــوت خفت طابــــــــــــوكه فوكي يطشه جكليت
وبنيت اعله الكــــــــــلب قفلته بقفال فتحته شلــــــــون كلي وبيه طبـــــــــــيت
مامحتاج عيني تشــــوفك تفــــــــوت كفاي يشوف شــــــخصك لو تعـــــــــديت
عينك من تســـــــــولف ادري شتكول شعجب شـــــــخصك كلب كل نظره خليت
مو أصبع ندم عضـــــــــــــــيته وياك آنــــــــــــــه الزمـــــت كلي لكي عضيت
بس كلمة احبـــــــــــــك كتلك شصار دكلي اغلــــــــطت شتــــــــمت سبيــــت
كلبك ما تهده بجفـــــــــــي محضون وأنه كلبي بضبــــــــــــــــاب وياك هديت
تحني العـــــــين ضحكه وبسمة شفاك وأنه بمسح الدموع لجفـــــــــــــــي حنيت
جنت سعفه وتفـــــــــيي لطولك سنين أطلعت تـــــنور تالي بنصه طبيــــــــــــت
اخلي العين روحي لعينك تـــــــــروح ومــــــــــــــــلج الموت عينك لجلي سويت
اهد آنـــــــه اعله روحي واوكف وياك وانته الزمت روحي ابــــــــــــــــير هديت
كبل العيد أشوفــــــــــــــك لمن تفوت بس هسه الطبك لو يمـــي مـــــــــــــريت
أعاند بالكلب ما اوصــــــــــــلك عود والكه الكلب رايـــــــــــــــح وانته سديت
دربه وقفلت كــــــــــــــدامه الابواب وكلت ممنوع غربه ادنـــــــــــــــس البيت
لكن مااظن يوصلك بــــــــــــــــــيوم لأن رجيلينه عمــــــــــــــدا بيدي كصيت
وإذا حاول يجيلك يزحف زحــــــوف هذاك الوكت يهــــــــــــــدر دمعه خليت
