احمد الحسيني
شفت لعابتي وكالت اجو خطار
كمزت روحي مني وصحت جوي اطفال
شاورت الكصيبه المشط وين يصير
كالت بالمجر مشطيلي اريد انشال
وكنتوري انفتح أشرلي عالنفنوف
كلي يلوكلج يا شمس وسط هلال
بدلت وطلعت اركض واجه الفراش
يلعب يم وجنتي ورسم بيه اشكال
رحت لأمي ومشيتي اتلزّگ عله الكاع
يكولون التمر من رجلي يملي سلال
وين اطفالهم يا يمه ؟؟ ميلعبون؟؟
آنه التوكي خطيته وبقت يبدون
يحبيبتي اجو خطابتچ بالهول
يردونج بفاتحتج بدو يقرون
شنو يخطبوني؟ هاي اللعبة من يانوع؟
ختيلان لو جار اول يريدون
تتزوجين يحبيبتي بعد اسبوع
ودفعولج مهر يترس الف ماعون
اروح العب كلت شأفتهم حچي كبار
ومشيت بلعبتي واسمعهم شيحجون
خمسة بعشرة بابا يكول للخطار
يعني خمسطعش حاصل جمع رقمين
ونطرت اللعبة تكمل بس اجاني الصوت
وزعوا الشربت وهلهولة تفكس عين
وصيحوها لان ماشافها العريس
وطبيت ولعبتي مشبكة الجفين
هلو عمو كلت والكرصة اجت بالايد
يهمس بابا باذني يريد اكول اسمه
لا يا بابا عيب واني عندي اخلاق
المعلمة معلمتنه نكول جم كلمة
الي بكد ابونه نكله عمو وعيب
نتجرأ عليه ونندها بأسمة
وعفتهم وحضنت لعابتي ويه دموع
لان ماكو البكدي واعرف اقراهم
صعدت الدرج والكه العابي تبجي تصيح
لتعوفينة وتروحين وياهم
وخلص الاسبوع خلصة لعب بيت بيوت
وجمعت هدومي بس وياهن الالعاب
ونصحت بيه امي تكلي رجلج هاذ
سوي الي يريده وما نريد عتاب
دخلت وياه لبيته يكودني من الايد
وما جنت ادري ايده تكودني السرداب
واجو دفنوني اهلي ولعبي بعده يعيش
وصفنتي تفتح من الجنة عشر ابواب
