أزهر كريم
هاك اسمي… ودرب جدمي..
وسجلني نذر لاول صليب يأذن بگربي
وجفني بنبي وقرآن
وادفني بجرف بدموعي متوضي
تعلمت من اريد أشتاگ
أشم گاعي بحضن امي.
وشم الغيم لو راد بسما يخضر!
وتعلمت من الم الناس
أحچي أوصية الدخان,
ولم العثگ والماي المشه بروحه
ولم دربي أعرفنه طريجي بسچة الدفتر
وانه ازغير يممني گفة التابوت بترابه!!
وامي بعكس كل الناس شدتلي حرز شاجور!
وگالتلي العشك مهيوب محرابه
وگالتي الشمس بالطين تتحنه أذا جاعت.
وگالتلي النذر تابوته نسيانه
الكل چلمه منيه ولو نويت اتطيح
يبني أتعوذ بگاعك
السمه من تخاف تلبس غيم؟ عن لاتنعرف زرگه.
الفجر من ينخطف لونه تشوف انجومه محترگه
والي يهلهل بدرب الخوف؟ تگوم الگاع وتشبگه
يوليدي الحصاد يلوگ للمنجل؟
من تشوف ذمة طير مرخوصه فشل دنيا.
ومن تشوف دمعة طفل ترچية حچي جنازه
تعدي غيوم چم گمرة توازي الليل ع الظلمه
وتبدي الشمس طاريهه
أذا سلمت عل النجمه
مو عيب العثر مرتين!
جم غيمة ع غيمة تموت
مافز النهر واغتاض
جم طيف ع طيف يضيع
ماشفنة اليغمض هور بعيونة
يوليد
الرصاص الطاهر أتنخاه
يفزعلك عشيرت نخل ماعرفت سواترهة
ومالك شغل بالتاريخ سولف والضوة بظهرك
هاي النار سالوفة شمس والكاع بالحاصودة تتباهة
فشل دير تصد بس العلم بعيونه يسولف
يبني لاتلوم الغيم؟
النهر لو جاس زلفه الشيب بير يصير
طش ع الفجر صوتك وأنده ذمة حروفك
الناس العدهة فشلة الطيف ماتغفة
وأحصد كل ظهر ماسولف بفية
وأحلف بالخمر لو شفت ذمو كاس
وأعلة بجلمة اميه
َ وصية دم…..
شما تمشي النهر بعدة.
شما يطغي السواد يموت.
اليعثر يدنك خطوة اجدامة!
