بسعر خبزه تقنع الايتام

خل اصبغ حذائك اهلي جوعانين

 لاترفض سؤالي شراح بيك يصير

خل نفسك مكاني الفلس اجيبه منين

 هاك فلوس كتله ولاتتعب الحال

فز بكبرياء وكلي شبعانين

 وحك امي الي ماتت وسط حرب الجوع

ماناكل اذا مو احنه تعبانين

  ماافتح اذا مسؤول دك الباب

ولو ماعدنه بيت وماكو مسؤولين

 بيت الطين طاح وهسه صار تراب

اكل جلده المطر ونداس بالرجلين

 انه املك قصر من الجروح جبير

يكبر كل دقيقه بعكس بيتي الطين

 ماتملي القصور عيون بعض الناس

 وانه الدمعه عندي جبيره تملي العين

 يدحج بالشمس بنيان هذا وذاك

وانه عله الرصيف اخواني ملتمين

 حته الموشريفه تصدلي باستحقار

جن هيه الشريفه واحنه موزينين

 واذا مر عيد خدي تبوسه بس دموع

واحس روحي غريب بين المعيدين

 العمر رمضان عدنه بس بدون فطور

وعدنه فطور دمعي مفطر الخدين

 بمدن الالعاب نصبغ من يجينه العيد

عالدولاب عين وعين عالرجلين

 جهال الناس صعدو فوك خد الغيم

وردت وي خوتي نصعد مارضو بالدين

 جبيره القصه كلش واحنه حيل زغار

وماجيتك اجدي وماردت اليعين

 بس ماكتلك تدري شوكت نرتاح

من يقدر الله ومانظل عدلين

 من يقدر الله ومانظل عدلين