سيف الحلفي
يرادلي شوي صبر
وشوي ارادة وعزم ..واستوعب اللي جرة
وهم عندي منهن هذن
ضميتهن للزمن
ماعندي ميت صدك..بس حافظ المكبرة
وممكن اعيد النظر
فدوه الجنح الانكسر
كل ريشه من الجنح ناذرها للمحبرة
ووصلوله هذا الحجي
الماضي جدا مهم
من يمشي صح القلم..لاينكر المسطرة
ذاك السحك خاطري
وفززني من الوهم..من كلبي اريد اشكره
مستانس ويه الالم
يحييني دوس الجدم ..شايل طبع كنطرة
ومو عيب حال الفقر
العوز..رب الشعر
سولفها للمادره
المحار ابن عائله
عاش على كد حالته..بس خلف الجوهرة
كلمن جرحني ومشه
طيبة هلي تفلشه
وصح مايعثره الحجر..بس حوبتي تعثره
يحفرولي طول السنه
وادعيلهم بالهنا
البير شايل كلب..من تحفر تكبره
ماعندي كل مشكله
بعيوني كوسر دمع..وبكلبي الف كربله
ومن راسي حد الجدم…
يمشي عله طوله الجرح..لتكول ديرة هله
ومااكبر المشكله
متهمني قصة انتهت..عله يااساس انعزل؟؟ بعده العمر بأوله
واتعلمت عالصبر…
مرات افوت بدرب..بي وحدي والزم سرة
لازم اذل الدمع..
والبس وجه مو رطب..بي ضحكة متخوصرة
والمشكله ادري الفرح..بي ميزة مثل الشرف..ينباع مانشره
لكن مشيت بدرب
والرجعه زحمة علي
من الميل انه تعلمت..ماارجع اللي ورة
مسير متاعي الجرح..وشثكله وجه الدوه
امشي بدرب..منسحك…….بس يمي صاير طوى
ومازاحمت اي بشر
انه عله جرت النفس..مترخص من الهوى
ولميت دمعي البقه
بعيوني مطرة ثقه
وراح انسه كل الجره
