رائد ابو فتيان 

يا محله ذيج ايامنة الماترد

من جان املنه شايلينه بجنط

وحساسك الانثوي وحساسي الخشن

بمدرسة حبنه يداوم المختلط

جان المعلم يطرد المايحل

ومن ما تجاوب اني اطيح بورط

خاطر يطردني وجيلك ركض

لو يسأل اعله اسمي اجاوب غلط

الزعل عد الكبار يترك حقد وجنه

احنه افهم من اها الوعي

جف الصلح منعرفه يعني شنو

تزعل وترضه بس امد اصبعي

ومن وره عيونك كمت اشخبط شعر

وبس علفرح كتلي اكتب المسمعي

وجي انته يمي جنت اكتبه الفرح

وبس درت وجهك جربيت النعي

اطفال نمنه واخذ حصته الزمن

لمن كعدنه مار بينه الكبر

وقلدت انته انسان حب ابوفه

وجنت انه اقلد اليدك بس بحبر

اكتب احروفك فوك منهن نقط

وتمنه كدامك يصيرن خضر

وكشخ واجيك العصر وضرب ركن

وبحجة ترش بابكم تنتضر

منكول عيب الناس جي حب صدك

مومثل هسه دغش بس بستر

وتلاكفتنه الجامعات ومشت

انته بكتر ذبوك وانه بكتر

ذيج البراءه انمسحت منلوجه

المكياج سوه خدود وجهك صفر

كروبك بنيه ومادري كم ولد

تركض وياهم ماعدت تنتضر

ولمن تعرفني صرت تنحرج 

تكلهم كرايب مو صديق العمر