سلوان المحمداوي
امس صافن وافكر جنت ولهان
وانه بصفناتي اسكت كلشي ماكول
وصوت امي ندهني وجنه الاذان
وتوضيت اعله صوت امي .. يمدلول
حجت تجويد مو كلمات نسوان
وترتل جنهه آيه بطورهه اتكول
الولد يبني اشحلاته لمن اينام
وتصيح الله واكبر مو دللول
حي اعله الحنان الوالده اتصيح
تكوم المايكوم وجان مشلول
امي الخلت الخرسان يحجون
وامي الخلت المايحس مذلول
امي السودنت يعكوب بالضيم
امي الــ بالنواعي الامهه اتزول
امي البجت الناي اعله فركاي
وشرد منهه عدوي وعزل الجول
امي بيوم تنعه اتبجي الطيور
وتهز الدنيه لمن تسمع ابجاي
امي الراح منهه ايعادل الكون
وهو الرايح امن امي ايحشم الجاي
امي امن اعطش اني تجيبلي دموع
ومن زمزم دمعهه اتجيبلي الماي
امي ام اليتامه الدكهم الجوع
التسمو من حلاة الجوع جيـــاع
امي الهلهلت عالفشك من ثار
وهلاهلهه لتفكنه جانت امتاع
امي الــ من زندهه اتغذي الايتام
وتكص اضلوعه اعله الولد لو جاع
ابحضن امي ربو عشرين مليون
نشامه وبالشدايد كلهم اسباع
امي لو بجت ودموعهه اتطيح
تصير الدمعه فاسه وتحفر الكاع
امي النجمه اتغازل بيهه
وامي المتنبي ايمر بيهه
وامي السياب ايحاجيهه
قيس اترك ليلى لعين امي
واعيون امي اتدولب بيهه
عنتر لمن زاعل عبله
كل قصده اعله امي ايراضيهه
امي الجابت وصلة يوسف يم يعقوب
امي الصبرت .. صبرت .. صبرت
حد ما مل من عدهه ايوب
امي نسمه
وامي النجمه
وتاج الراس
امي الغيره
ورمز الديره
ابحب الناس
امي الضمت جوه الشيله
راس حسين وجف عباس
امي الشيعيه وبالهده اتطك بركان
ومن تبرد سنيه تصير اتحب عثمان
ابكل شده اتصيح يا حيدر
ياحيدر يا داحي الباب
احفظ شيعتنه وسنتنه
وكل اعراقي امن الارهاب
امي العربيه ابلهجتهه
لكن .. كرديه ابفطرتهه
كلدانيه ابحب العالم
واشكال الجنه ابهيأتهه
من صوت امي الونه انعرفت
ومن ضيم امي الدمعه انصبت
ومن ضحكتهه العالم ضحكت
ومن خد امي يفوح الجوري
من ثوب امي .. نفصل ونه
ومن شيلتهه .. انشم الجنه
ومن حبي العالم غنه
يا يــــــمه ترابج كافوري
هاي امي وام كل اعراقي
وام كل طيب وام كل راقي
تنزل نجمه اتغازل بيهه
واتبوس النجمه ابرجليهه
