احمد الياسري

الك أرواحنا مرخوصة ياعراق

وخل أصواتنا تهز المسامع

اجينه يا وطن نمشي على الموت

وتمشي ويانه عالموت الشوارع

بكل شارع نشوف حسين مذبوح

ومصلوب المسيح بكل تقاطع

ومن شفنه القنابل تمطر عليك

حفرنا صدورنه لجلك مواضع

لأن مانرضه نركع داخت الناس

من شافت حدرنا الموت راكع

هاي التضوي ابد مو شمس يعراق

دمنا المن طلوع الشمس طالع

واذا حصدوا فرحنا وزرعوا الموت

تخضر من مناحرنا المزارع

وين ابن العراق اليرفع الراس

وين اليفضح اصحاب المطامع

قاتل وانتصر وادحر الارهاب

وبالك يابطل يمنعك مانع

الفرق بين العراقي وبين الارهاب

مثل فرق السمة والگاع شاسع

فرق بين الرضع من صدر هالگاع وفرق بين اللي وي إبليس راضع