نوفل الصافي

الكره يبطل وضوء 

والتبات ابحضنه غيـبه يغتسل باقرب نهر 

للشوگ دافي ـ على الأحوط ـ مرّت ابجرفه حبيبه 

ولو سمعها – وإن سهواً

يشطف اذنه نص نهار ابنده تغريد البلابل!! 

اليمس خد الورد كفارته يزرع حديقه 

واليصافح چف جراده… امنين ماچان 

انتماءه وانتماءات الجراده فهو باطل.. 

ديّه يدفع للسنابل .. حرگ گونية مناجل!! 

الـبـيوت الخالية من طير للحب ما تصح بيها صلاه ..

اليطوف الناس بحرام المحبه 

حجته مقبوله ولا يحتاج للكعبه وصول 

اليصلي وقبلته ارموش الفقير.. 

وما إجه ابّاله اشحچه اشگال الأمير 

اشلون ما رايد يكبـّر خل يكبـّر 

آنه اضمــنــله ابـتـسامه من الرسـول 

الدعاء ابلا شــعــر للناس.. للحب 

للأمل.. ما مستجاب. …!

ولو إجه فرض القصيده ما تصح 

تـُكتب قضه ..

لوحة المليانه حب .. تبقه 

..وتــموت لوحة المرسومه لون امچفنه 

اعله الحايط بتابوت خشباته شعار 

واليعض شفته ابوجه باب الشتيمه 

إنتصار. 

ريحة البارود محظوره بتاتاً

واليـــلامس سيـف يكفلّه يتيم 

الشبابيــچ التجــيلك منها ريح 

إرسم اعله اخدودها بوسة اشراع 

وابحر اشـما مدلك الله ابروجه بجناح الضوه 

لا صلاه للخوف بمتون الرسالة 

ركعة الرجفه حرام 

ليش خايـــف؟ 

القصور العاليه خدرانه حـــــــيــل 

والحچي بس للصرايف 

واللسان مو فقط للضوگ.. 

والله مو فقط للبوس خالقها الشفايـــف.. 

ليش خايـــــف؟ 

اللسان الينگص ايخضر اهلال 

يركض اعله الباچر ابحلم الامس 

ويجي باچر ..

ويجي شاعر .. 

يكتب الجملة الكتبناها أمــس!!! 

الچــان باچـر يوم چنـه اول أمس 

وهاي هيه

الغيمة غيمة اشما يدثرها الظلام …

اطــيح من تـضـحك شمس 

النجمه من تموت لاتلبس عليها الدمع الاســود 

الگمره تحبل كل شهر تنطيك نجمه !

إرسم الطيف اليعجبك 

وافتح اعيونك تشوفه.. 

وابصم ابخد السمه اللون التريده 

وللأمانه .. 

الگاع حره.. فشله تتخطط سجن !! 

وللأمانة .. 

الدين حل المشكله.. 

وعيب يصبح 

مشكله وتبچي اعله حل 

الله خير اچفوفه مليانه فراشات وسلام 

المحبه اقرب طريق الباب حنية الإله 

الزكاه واجب على كل المشاعر 

ابلايه حب .. تكفض اجفون البراءه 

تنطفي الدنيه ويخوط الليل چايه بالصبح 

تنچفي الذلـّه عله خدود الملح .. جربة دمع 

ابلايه شوگ .. 

تنشف اللهفه وي*** ابليس بعيون الشمع 

النخله أم 

شجرة التفاح أم 

ونومة العاشگ عبادة شرط 

ماناسيله موعد 

الگلوب الليلو اكلادة عرش 

ما يطب الجنه من يرعب فراشه 

آثم اليصنع مخده نوم من ريش الحمام 

الشهور الحرم عشره الباقي عيد.. 

أحمر الشفه غروب يفتح الليل 

اعله موسيقى الجمال 

والتيمم جائز ابكحلة عراقيه اصيله 

العراقية الأصيله 

الشدّت ايزار الحصار 

وطبخت ابجدر الصبر لمن سجد.. 

يمها كلشي ابّالك ايصبّح حلال 

العراقي ..الينحني ابنيّة وقوف ايعبـّر الجيل الوراه !! 

الخط الأحمر يبدي من باب الطفوله 

امن ابتسامة طفل مثلومه 

عله اضفاف الشفايف 

تاكل ابلبّة لهاته 

شوغة اخرس ترفس ابگلبه قصيده 

حوبة البلبل چبيره 

اتعثر الشط ّ و ثلث ترباع 

من بحر التلوحه 

الخط الاخضر يبدي من باب الطفولة .. 

ابطور “داخل” 

والدللوش الحنينه ابصوت فيروز 

اليذكرني ابوطن منهوبه ترچية فراته 

طور داخل حرز عن غول المكابر 

والـ (بنفسج) تنقره حين الولاده 

اتگطـّر ابإذن الرضيع 

ويّه كل فرة اگماط اتلولي فيروز 

ابدللوش امهاته 

الخط الاحمر يبدي من باب الطفولة 

وينتهي ابخيط البريسم 

خيط البريسم مقدس .. 

شيلة الأم علم والـ (چِــلاّب) راية 

والشبگ تنور أم حته ـ لو باقي أثر ـ 

يعتبر طالب لجوء .