مشير السعيدي
والله موش ارخيص دمك ياعراق
بس رخيص الباع دمك واشترى
دمك اطهر من شرف كلمن شريف
مايدنسك سحت ساسه اوسمسره
الك نسجد ياوطن بعد الكريم
اولوله حيدر چا گلت خير الورى
انت راسك فوگ شامخ مايميل
اشلون تتساوه الثريه اويالثـــــره
ياعراق حسين من يجسر عليك
اوحارسك عباس سبع الگنطره
طبع رحه ادور تطحن بالطغات
اوطبع گاعك لليدنسك مگبـــره
گوم فصِل اچفان ذباحك بديك
گوم شعبك ينتخيك اعلى الجره
گوم سيفك تنحني اگباله السيوف
اولوله سيفه امنين نعرف عنتره
گوم شيمنا اعلى بختك ياعراق
وانا انا الگالك بــــــــس ثرثره
گوم يحلى ازماطها ابحر الوطيس
زلمه ينحر زلمه واليختل مــره
گوم فك الثام تجار الحروب
اوخلها بالخطه تدور امحيـــــره
گوم واگطع دابر الفتنه اللفاك
جلد ملك الموت موتــــك كزبره
ذوله زمرة موت ناسين الضمير
شله قطاعة طرق مستهتــــــره
اينعت روس الخزي اوحان القطاف
گوم گصها اشتنتظر ياحيــــدره
