حامد الشمري
هم تدري بمدارسنه هل ايام
وبلصفوف القديمه شصار ماصار
خير من الله طاحن قسم عالكاع
وقسم باجر يطيحن فوك الزغار
زين الحل شنو وننقذهم شلون
وتدرس وين ولد السومريين
كرفانات راح التربيه اتجيب
واظن يطورن باجر زنازين
لون ابوكت اور المسأله تهون
بصف زقورته يبنيلهم طين
وشركاته ابد متغش بالانشاء
ورجال اعماله ماجانو شياطين
واذا تنحال الهم مدرسه تقوم
وميهددهم ابدن صاد لوسين
ومايشرد مقاول اور فد يوم
الخجل جان بصراحه مشبكه مودين
امس بصف الاول عود مريت
على السجلته اسأل وين ماوين
معلمته تدور ساعه وياي
لان صفهم عدد طلابه سبعين
محسود اليحصل رحله محسود
متربعين عالكاع المساكين
بسط يحتاج الهم ماكو رحلات
ونجيب شيوخ تشرح مومعلمين
تدرسهم عالكوامه وعالفصول
وعلى العطوه وعلى هزة الفناجين
واذا بزاز مامشه اعلى بقال
ندز قدوري يرميه بطلقتين
المدارس والبناء تريد طابوك
والبلد ماعنده ميزانيته فلسين
على البسكت امس يمكن حرجانه
مسمم جابه يمكن جابه بالدين
