احمد الذهبي
رهمتك عليّ بس مارهمت وياي
انت الماردت شتريد اسويلك
عاشرتك نجم من جان عمرك ليل
اذوب واشتعل حتى ابقى اضويلك
وبس طلعت شمس خط رجعة ما خليت
وما جازيتني من خلصت ليلك
بانيلك جنت حضرة عشك بالروح
ومرقد للمحنة بروحي بانيلك
ردت منك مراد وخذت مني مراد
وعلك بجفوفي شايلهن زناجيلك
انذرلك جنت وافتر واحني الباب
هسه اتهدمت يا باب احنيلك
امانة اسرار عمري وبيها ما اوصيك
يم شباك ذنبك صاحن دخيلك
وبكيفك بعد تخون الامانة تصون؟
ما اكدر بعد اغفر واعديلك
ما بينك وبينك حيرتني وياك
مرة ابجي على طبعك مرة اغنيلك
بدلالك جن طفل بالجرح مال كبار
واشد الجرح بيدي وبيدي الوليلك
لا تنصف عديل لاترضى بالقسوم
تاخذ حصتك ومن حصتي اوديلك
انت الوزعت والفرح سهمك صاب
من سهم الحزن شتريد اخليلك
جبتهه وياك شعره وعاقل ومجنون
كل ساعة وتجرها واني ارخيلك
شلي بهالتعب والعمر وشلت كاس
من كاس العمر جم دوب ابديلك
راح اصبر بدونك وارهم بلياك
واذبح رمش عيني الجان يبجيلك
واتحمل عذابك والبعد والشوك
وما احط صورتك كدامي واشكيلك
وما اكلك نسيتك بس جرح بالروح
يكسر واهسي وما يقبل امشيلك
عيني الشالتك كلتلها شيلج راح
كالت شيلني وما قبلت تشيلك
وجرحي الفاك صدره وما يريد اخياط
واكف جنه واحد جاي يدعيلك
بس مجبور ادفنك يا عشك يا شوك
واقره الفاتحة والوحشة اصليلك
وبعيوني الحزن يقرونه الي يواسون
والفوك الحزن لو تدري شأحجيلك
شماتي الي اجو واسوني ثالث يوم
حيل وياك كالوا مدري شد حيلك
وكالوا مو حلو الثوب الطويل عليك
واليكصر بعد شتظن يكفيلك؟
اليكصر بعد لا تظن يكفيلك
