يحيى العلاق
الى مايسمى الانسان العربي ……………
ابمولدك مالك خيار . ابموتتك مالك خيار .
يانتيجة فعل فاضح ياحصيلة خلوه في احدى الديار
انته غلطه ابعقد شرعي. ..نزوه مدعومه ابقرار
انته سلعه ابلا ضمان ساعه عن العمل تعطل ساعه تعطل بانفجار!
كلشي عندك مايخصك عينك الجدك الرابع.. طولك الجدك السابع حتى طبعك مستعار
طيبتك من دم عمامك…عصبيتك من خوالك لأن خالك دمه حار
الصدفه لعبت دور بيك…وراح اكلك شنو الصار
والدك مره استخار
يرتبط .يتزوج امك يستقر يفتحله دار
حتى ماشايف شكلهه الحب ثلج والرغبه نار
وافقت بالحال امك وكفت اباقرب محطه..وصعدت باول قطار
وافقت تحت شعار!!
جوه ظل رجال احسن..من عقم ظل الجدار
اتصارعوا امك وابوك ..اتضاجعو ليل ونهار
عاطفه اشبه بالشجار !!!
ابدون كلمه.. ابدون همسه ..ابدون ابيات النزار
خلصت ايام وليالي..مرت اشهور انتظار
صرت انته الولد صار
حتى تحمل اسمه هوه..وحتى تحمل نعشه هوه هذا دورك باختصار
وي نزلتك نزل دمعك تدري نفسك للزمن مطلوب ثار
والدك يوميه يدعي…كون تطلع ولد بار
وصرت فعلا ولد (بار)؟؟
لان اولاد الجوامع حللو دم الزغار
والدك جان ايتمنى… اتصير اكبر مستشار
رغم مايوم استشارك…والدك ضد الحوار
وترجع انته ابكل عزيمه واقتدار
تتبع نفس المسار
اتكرر السواه ابوك..ابطن وحده ابطيبة امك خاطر اتعوض الهزيمه بأنتصار
