رائد ابو فتيان
خليك بمكاني وعيشلك يومين
ومثلك كون اصير وجرب العشره
وشوف شلون تخلص عيشة المطلوب
دم واهل المضايف منه تتبره
اقوه امن الخمر تأثيرك اعلى الروح
انعد عالسكاره وماضكت كطرة
انه وي شوفتك داس اعله جفني الليل
وموبجدامه داسة بحافر المهرة
يالتنعس كَبل مايطلع الخفاش
انه بلياك كاسر خاطر الكَمرة
بس بالحلوة اشوفك ..بالفهاوة تروح
واني مرافكَك عالحلوة والمرة
انه امن ابجي انشف هدومي مو لخدود!
انكَع حالي حال الطالع بمطرة
وثمرك وينه خاطر بالحصاد اتخاف؟
نفع مابيك واني انحاز للشجرة
ما اكَطع التنبت بيه لو صبير !
فلاح واحب السالفة الخضرة
الطبر بيدي وكلون خاف عش فوكَاك
لو عاشكَ اتعنه وبيك خط ذكرى
اعله كَد عقلك انطيتك من ردتها حساب
بجف طفلة حسبت ايامك المرة
وكَلت عد السنة ووفيلك وعديت
وخنتني انت كبل ما اوصل العشرة!
ابالك موش واحد ناس يتمشون
مو بس اسمي صاير وجهي متذكره
وجي سنك ذهب تضحك جنت وياي
لان تدري بلمعته تضوج الفقره
وياملكَة التهون فشلة المطرود؟
الطلع من الكَلب نفس الطلع برة
اليشرب ماي بير بطعمة يلكَة اسرار
وشكظ منك لكَوك العطشوا بصحره
مجتف للخبز بعدين للعباس !
الوزعته بثوابه وجيتني بعذره
الخريف اعله الزرع بس يمي مر عالناس
شكد جاملت ناس وجوهم صفره
وانت ولا كَلت من دوني وحده يعيش
انه بمحجر عشت وتخيلك بسهرة
الشمس شدت رتب لجتافي من تانيت!
بمكاني وعدت امن اليمنه عاليسره
تمنيتك تجي لو شخص ثاني وياك
وبيدك كَايدة هم موقف اعتبره
النسيم العاصفة مو فرق عالغركَان
نفس رايد يعيشه حتى لو حسرة
والمات شماتثوب الروحة ميساويك
ويه المعتنيله وباجي يم كَبره
يابويه التحبة شينكره مكَفاه
تحس راح امندينك من يفرر خصره
بعيون اليحب الظهر يقره وداع
وانه طولك عمر ماشفت بس ظهره
منا وانتهت..مدري انتهت منــــاك
من صديت شوكَي بعينك الحمره !
