كاظم الركابي
لولي على مسعدك / ابحس الذي يريحه
وشرع ارموشك هله / للمعتني ابجرحه
ولولي لكطع النفس / لولي لمن يصحه
الليل موش ايحصد ليله/ ايحصد صبحه
والحصو موش ايحصد روحه/ ايحصد جدحه
اجرحني يمن عتبه لك/ جرح المحب فرحه
ولولي اعله روج البحر/ تالي البحر ملحه
والملح عز ريتك/ يالبيدك الرحه
اطحن..اطحن ورد خواف.. خزاف بالظلمه يذبل اشفاف..!!
ويعوف الما يلونه الليل
بالظلمة ولا ينداف
النده.. الكمره.. المحاچي البيض
من تصرخ بلايه اشفاف
ولك.. ولك والليل مزويه
وكشر ليطه ابكترهه التاف
وهندسهه.. وخالبهه
الليالي امن ابتسامة اتخاف
وانته.. انته
اشما تطك ضحكه ..شمس بالگاع
اعشگك للبرد.. للجروح ماتنراف
واضيفك للصريفه الهدهداهه الليل
واورجك عـ للي ماينشاف
بواچينه عمر وارداف
ومثل دمعي.. اعشگك عشگ ماينعاف
ومثل جرحي.. اعشكك مذبحة ومنجل نجش الدنيه وانبع فرد شتله ومثل متحزم الشبه
فناجين.. وزلم.. وادلال
يحزمنه رمش سعفه
وشدات الورد تحله اشحوت بكتارهه امن الوان
وماطول .. ماطول الكمر معشوگ كل امچان
انه اوياك فد مهره
وبچفهه ايگود فد اعنان
نهب اويه الهوه المحد وضعله احدود لو نيشان
ونلگح من طلع نخلتنه كل بستان
فلح.. فلح والدنيه اهالينه
وحگك لفح شرجينه
لو حتى (ابهروشيما) يطك ريحان
سرجنه النجمه يمعلي..
خلي .. خلي اشما عليه الطوفان خلي
وحگك هامة المالوم تعلة اشما عليه الطوفان
واشما علينه.. علينه.. تظل رية النفس للكاع
من عرج النخل والحنطة تسگينة
ماتعله سمه ابلا كاع ماتعله
يالاصابع.. ليش ماتحوين سيفج يالاصابع
ويا الف خرزة اعله جفك مازحتنه
اشصفة أمن أمزاح السبحة على اجفوفك
ثلاثة .. أثنين .. ويامكثر خرزنة الوشم ادروبك
وبجفك ليش ماتحوي خرزهه اشموكح أچفوفك
يبو حلو الغناني .. يايبه.. الما حسبت هيچي اشوفك
رفيفك من رفيف الدف.. يخمد .. يخمد أرفيفك
تخمد.. تخمد ادفوفك
وانته .. انته ابين اديك ادفوف زنجيه
لچن مامش اصابع تنكر ادفوفك
يبو حلو الغناني
يبه.. الما حسبت خيجي اشوفك
او لو .. او لو شوگك وشل گطرات
والباجي رعيده
يبو الروجات كلهن هم.. نحب همك
بس كون الهموم اتهب جديده
محنه .. محنه صفنه شاعر امدوهن
نصب شبچة القصيدة
بلچي چلمة .. ونذر چنه
وما يهم بطن سچچنه
وگاع الردس صارت اظافر
الليل طال وبخت عنده اليروي عينه ابشمس باچر
الليل بين العين لابين الجفن انثر گزازه ودار داير
الليل حاود وردتي وحشم عليهه الدود من كل المگابر
وصوتينه الصوت ما يجزي الشفايف
يادفو.. يادفو البين البرد والحر نريدك وين صاير
يالفراتي ولا سمعنه
ابوجه روجك يوكف احجار الكناطر
لو صدك جرفك نشف والنبع عاجر
وللرمل ابقه جرف.. للطين اوشلك حياتي
واسكي كل وردة انكطع منهه وريدك يالفراتي
او لا أخلي الكلب الاسود
يشتفي ابجرحك
يسفان النجم
يامخبه.. ياصوره.. مواعيد.. وحلم
هذا انه ياعيني اهزلك منجلي
اشبكني بزلوف الشمس أشبكك ابحز منجلي
اضحكلي بشفاف الشمس اضحكلك ابسن منجلي
ولاغيمه تحبس ضحكتك ولا خاين ايجل منجلي
شديته بالشريان شد اوية العظم
وصار العظم هو منجلي
والمنجل ابجسمي عظم
والگلب فد دگه يدگ
نوبه الك نوبه الي
ولو غاضهم طيب العشگ
وشدوا عداوة الخطوتي
المنجل على اشفافة چلم
ومسگي الچلم من شفتي
ولو ثلموا المنجل ثلم
المنجل يثور الچلمته
ولو دفنوا السنبل دفن
كل حبه تحمل سنبله
ومن ينحصد ريع السگه ابدمه مرز
تصبح سنابلنه خبز
ومن تمضغ الدنيه الخبز
دمنه وفي .. اربات الملح
والوردة لا.. ماترتوي الا ابجرح
ومنهو الشيح عن وردته انزيف الجرح
منهو .. منهو.. منهو..!
