يونس جلوب العراف
لتكليلي احبك هالكلب عاشور
وابغير الدمع ما اعرف اتغزل
شايل حزن زينب من لفت للشام
ولوحاول اغني ينكلب مقتل
وشوارع بسمتي كلهن نقط تفتيش
لذالك بالظهور اهواي تتعطل
شتحبين مني وراسي تاجة الشيب
وأمعمم قلق وبحزني أمحجل
انا شراعي ندة وموج الزمن طوفان
وإشلون الندة وطوفان يتكابل
اكسباير حياتي، اشينفع الترميم؟
اسئلة امتحاني هاربة امن الحل
وأعصابي قبائل مدمنات إحروب
وعلى ذرة رمل من صحرة تتقاتل
فصولي الاربعة ناعور ملح يدور
واختلطن علي ماضي ومستقبل
وردت حالي إيتبدل حتى مرة ارتاح
تبدل كلشي بية وحالي متبدل
وسواد احزاني كحلة ابعين تجري احروب
ويومية الارامل منها تتكحل
وسراية اجيوش صبري اتمردت عالروح
وعلى جبهت احزاني صفت تتكتل
وافكاري حكومة امخالفة الدستور
والكل ايتظاهر واليقود اثول
وميت انه لاكن صبر عزراييل
ولإشعار آخر موتي أتأجل
فلا تتقربي من عندي،و ابقي ابعيد
