عادل العضاض
وي… يطكني العطش و انه بجالي المي
وي…..! انه بكوسر مضيفي وما اجد في ّ
وي….! تمر بيّ السنين وحالي يا حال ؟
جاهاي الربع مابيها الي خي ّ؟
وصرت مثل الغريب وبين هالناس
احير بليلي وين اكضيه لو لي
وآنه اشما اوجد ابجدمي اعله الرمال
غميجه وما تكيّش دوس رجلي
* ومن قصيدة) :
اوكف يازمن الغي المسافات
ماعدنه وكت بهمومنه انبات
مامحسوب عمري اليكضي باوهام
وجذاب الصدك مابينه احلام
آلام ….. آلام
كرهنه كل علامات الاستفهام
……………
*ومن قصيدة (امنين ابدي ) :
منين ابدي والعمر سفره ابخريف
والمشي من غير سجه اصبح خفيف
مشاحيف….
اتصعّد اتنزل ومخبوصه المشاحيف
والروح مثل اهمومنه ….
يصعد يبوس الغيم
وتتيه المشاحيف
وقصيده الى صديقه ورفيق عمره الشاعر الفذ
الراحل كاظم الركابي يقول في قصيده عنوانها :
الى صديقي … كاظم الركابي :
تعال اهنا … شيل ارموشك ابعيني
وفتح ورقه بيضه … وابتدي امن اول
تعال وهاي كل اوراق عمري الصوفراها الليل…
ماذبها خريف ولا ابسن منجل
اتصفحني ……
ما تلكاني بس جلمات
تعّبها الزمان ولونها اتحول
يالشايل حلاة الناس ….
خليني اعله بالك لو ردت ترحل
*ومن اجمل قصائده المغناة بصوت حسين نعمه ولحن
الراحل جمال فاضل
اغنية (ما تجينه …ماتجينه ) :
ماتجينه …
والعمر خلصن اسنينه
ماعتبنه اوياك يوم … ولا جرحناك بحجينه
ياوكت مر ما تجينه
من غيابك غابت الدنيه بهلها
وروحي ضاعت وانت املها
وين ادورك … وانه ياما دورت
وين ادورك…. وانت وي روحي ضعت
