ادهم عادل
الدين ما يفتح مدينه بحجة الاسلام ويفجر الشباب!!
الدين ميحط الله حجه وسبب،،
حتى بأسمه اخلي لكل
فعل شرع وجواب!!
الدين ما يقتل معارض
لا يطم بنيه ما لبست حجاب!!
الدين يؤمن بالرأي وبالانقلاب..
الدين ميغثه حوار..
والله للتفكير مو بس للثواب!!
وآني علموني النصوص
احكام ما تقبل حوار!!
واليموت بلا جهاد بلا قتال
ويندفن ما بيده سيف يموت عار!!
آني علموني الفتح عصر ازدهار!!
آني علموني سبي النسوان والجزيه انتصار!!
واليحدد خلقي ويه الناس ديني!!
المثلي اخوي!
الضدي كافر!
ملحد!
وتاليته نار!!
ومدري ليش من البدايه!!
من البدايه!!
ما فهمنه الدين غايه!
الدين للمظلوم غايه
الدين للمحروم غايه
الدين للمجروح غايه
الدين للمخنوك غايه
الدين والاسلام مو معناها رايه!!
درسوني الدين تاريخ لمعارك
واحفظ اعداد الضحايا!!
واكتب آيه واشرح آيه
واحفظ آيه وفسر آيه!!
وابد ما فهموني مره
الدين ضحكات ونوايا!!
علموني الدرب واحد!
والطريق ل الله واحد!!
كمت اكره كل معارض
كمت اكره كل دوائر الاختلاف
وصرت اؤمن بالحدود وبالزوايا!!
علموني الفتح ما يعني احتلال!!
الدين يفتح ديره لاجل الازدهار!
وما يهم الديره لو تنزف ضحايا!
ما يهم الوالي يرجع
تسحل بظهره السبايا!
ما يهم الفكر يعرى
ونرجع نطم النثايا!
بس يهم اللحيه تكبر!
والبنيه بعمر عشر سنين
ندفنها بعبايا
