سعد محمد الحسن
يل مالك جذر ، لاتزعل وية الريح
خافنك بهويه وتنشلع سكتة
طيح عله الهوى وحب ايده من يغتاض
خاوي انت وبعد ما بيك كل عتة
علي تضحك يخايب وانه علو الغيم؟؟
على ادموع الفرح هم تضحك النكتة
يبو جناح الشمع متعلي وين اتريد ؟
تدگ باب الشمس چنك ، غشيم انت
ويبو سنون الخشب لا تعض چف النار
طفو سنين الخشب لو هفته وكته
ويبو زنودالرمل لتلاوي زند السيل
وعناكيد الصخرگبلك غدن تحته
على الماي الضحل يتونس التمساح
ويفرح بالوحل لمن يمد خشته
وعلى موت الشمس يتنومس الخفاش
وعلى الهندس اهدومه عيب ماخذته
طميع الاخطبوط وعندة ميت اذراع
لچن وكت المزامط ماله جفلته
المبرد صح خشن وناعمة خدود السيف
لچن ياهو الركاب انشكلت بذمته ؟
يبو درزن وجوه استهلكن بالسوم
وعلى باب الخجل اخر وجه عفته
بعد مالك عيون وتنكسر باللوم
ولا عندك وجه حتى تعرگ گصته
صحيح انت ضخم بس مو ضخامة روح
ضخامة كركدن بلوة ابتله بجثته
الگمگم صح جبيرودلتا لاذت بيه
لچن غصبن يدنگ راسه للدلتا
وصحيح السيسبان يلوذ بيه الياس
لچن ياهو صواني العرس عازمته؟
وصحيح الاثل عالي وفيه فوگ التين
لچن ياهوالچفوف توسلت سلته
وصحيح الجوري نام بمنة الصفصاف
لچن ياهو الخشوم تعنت الشمته؟
دخان المزابل يطم عين الكون
لچن عود البخورالحلفوا ابخته
ود العامري ارهه من ابو الحسنين
لچن ياهو اليلوذ المذنب بگبته ؟
وياهو الي ضربته تعادل الصوبين ؟
وياهو العل صراط يعبر بذمتة
الفراش يطيرمفرد والجراد اسراب
لچن ياهوالحدايق تحتفي بلمتة ؟
فوگ من الخشم متعلي عرش العين
لچن تصرخ دمع لو سمعت بطگته
مترهي الجبل بسما تعافه بيوم
ولا شالت خشمهه على السفح قمته
لا تغرك سكتي كون خلگي يطول
البحر يكتل بصوته ويرهب بصمته
ولا يغرك مچانك كون عالي اتصير
شما يعله النخل ينشف گبل وكته
ولا تغرك زنودك كون مفتولات
ابو فاضل سحكها بلا زند تحته
ولا تغرك حرثتك كون سهلة اتصير
العلاس ابن عمي الما حفظ عمته
ابن عمي صدك لچن خاله الذيب
اذا الذيب الخال شترجه منه اخته
علي دلى الحرامي وجابه نص الليل
اجه وياه ايتختل نمت كل ظنته
على الخيبة يتشلبه ظنته واطي السور
وحسباله يحوف ويترس الشمتة
وي اول جدم صحت انه ياهم ذول ؟؟
وي لمضة زمرهن من بهز صبته
استخطيت ابن عمي وادري بيه علاس
ومحد گالي ، بعين الظهر شفته
لاتعتب يگلبي ولا اچثر اللوم
كلمن طينته وكلمن لبن درته
مر يوم بشبح متعدي من بعيد
وانت بسهم حقدك من بعد صبته
صبته بلا عرف وبلا عداوة وياك
ولمن ما گرب لنه الشبح انته
ياعدوة مرض تنتشرمثل الريح
حتى انت ابد ماسلم من انته
