كاظم الوائلي  

أجة العيد وسِمَاك مدلهِّمة اغــــــيوم

وممنوعة عليك الــــــــــفرحة لـلدوم

طِحِت مثل السَبع بين المخانـــــيث

وعليك اتكالبت دُونيّة الگــــــــــــوم

اِجو من كل كتر طلاّبة احقـــــــوق

وتشفوا بيك من شافوك مالـــــــــوم

نسوا يوم الچنِت تاج اعلى كل راس

ونسوك انته الچنت حمّال الــــهموم

يا مسكين هسه اتشمتوا بـــــــــــــيك

وخَلــّوا عِزّتـك معروضة للـــــــسوم

كل منبوذ منه اتـــــــــــبرَّت الــگاع

اجه وگام اعلى ناسك ينفث اسموم

اشو ترجع وره صاير يابو الـــــــخير

بعد ماقدمت للعالم انـــــــــــــــــــجوم

اولادك بعد ما چانوا اســــــــــــــــياد

وواحدهم عگب ما چان مخــــــــدوم

صفوا خدّام ســـــــــــخرة بأيد الانذال

وسكنوا بالگفارى بطرگ الـــــــهدوم

صمنه وگلنه تفرج يـــــــــوم عالناس

وذا هيچي الفرج چا المــــــن انصوم

اظن طلعت صدک دعوات (الحسين)

من ذبحوا رضيعه ومات مـــــــظلوم

گضّيت العمر ثورات وحــــــــــروب

وعليك العالم بقواته ملـــــــــــــــــموم

بسّك ياوطــــــــــــن يا بو الحضارات

خلص عمره الشـعب بجروحة مسگوم

بسَّك للغريب اتطـــــّـــــِـــيب الجروح

ونته اِمن الجــــــــرح ما تگدر اتگوم

من دون الامم تبني انتــــــــــصارات

ونته ابكل حرب تاليــــــــــــك مهزوم

چا وين النـــــــــــــفط والماي والخير

وين الچان للــعازات مـــــــــضموم

وين أرض الخــــلافة و دار الاسلام

وهذا ابن الــــــــفرات ايبات مهضوم

دشوف ازغر دول صارلههْ الف شان

وبن بابل يعـــــــــــــيش ابدار مهدوم

غِنَت منك أمـــــــم وإنتَ اعلى هالحال

وردَّت بالــــــــغدر غربانههْ اتـــــحوم

بعد ما شبعوا الــــــــــــجيران نبذوك

مثل خبز الدِخِن ماكــــــول مذمــــوم