حازم جابر
يلعيونـك سمـه وطـول الحواجب لـيـل
ضمنـي بسمـه عيونـك اسـهـر واغـفـه
ويا ضي الـوجـه يالماطفـيـت بـيـوم
صدكـني الكمـر من يشتعـل يـطـفـه
ويا قوس القزح كل ساعه اشوفك لون
ويـمـر مـرات لونـك بيـه مـا عـرفـه
تحـل ليـل الشعـر حـد مايـلوح الـكاع
وتعـظ ازلوف بـدورة الـشـفـه
طبع بينه الجـرح ندعيلـه حتـى يطيـب
الـك بـيه جـرح ادعـيـله مايشفـه
وتسالـني شعـجـب ماوصفيـتـك يـوم
وانـه الحايـر بظلـك لـسـه مموصفـه
يـبـو صوت اليـغـرد ياسـحـر فـيـروز
الــك اجـمل لـحن بشـفافـك تعـزفـه
تمر مثل النهـر والخطـوه روجـة مـاي
واظل آنه اعله جرفـك حاصـد الوسفـه
ويالخصـرك مـدور كـمر عالي بعـيـد
مـد ايـده الـكلب مالاحك بجـفـه
ويكولون التمر ينضـرب بيـه امـثال
اشـو جبـت التبـرزل صـار الـك حشفـه
مـن عينـك نـده ينـزل وشـوفـه يطـيـح
يـلتـم بـورود جـفوفــك الـترفــه
تلتف اعلـه طولـك كل نـجـوم الليـل
ويـجي يـنـام الكـمر متوسـدك صفـه
واظـم سـرك عليـه ومـا ابـوحن بيـه
واذا دمـعـك بعـينك عيـني لتـذرفــه
كل اصبـع بجفـك يضـوي شمعـه بليـل
وكـل خصلـة شعـر مــن كذلـتـك عـفـه
يــا جـمـار عالـي وما اظــن تـنــلاح
لان عثـكـك هـدل ماشـالـتـه السـعـفـه
اذا بميـزان انتـه وكـل حواري العـيـن
مـاظـنن لـغــيرك تنـزل الكفه
احلى مـن العسـل بالشفـه مـن تنظـاك
ومـرح مثـل النسيـم ودمك شخـفـه
حدر زيجـك نهـر مضمـوم مـا ينشـاف
لان الله طـبكهـا الـضفـه عـالضفـه
يـا اول نده يـنـكط شـعر لـلروح
ويلـمـشـذر مـحبـه وضحـكـتـك زفه
شمـس الله واكبـر نزلت اعـلـه الـكـاع
اجـت يـمك حبـيبـي تـريد تتـدفه
