علي المحمداوي

شهكتك والهوه تيهته وشتم بيك…
وهوه غيري لكيت بريتك تشهكه….
موبس الخبز كاسمت نفسي وياك…
بحجت اللعب جنه نقاسم الشهكة….
عله واهس كفاك عيوني اخذها الشيب…
النسه وجه اليحبه تذكره الشبكه..
تعال عيوني سدها تعطل الدفان…
فضلك بي نقص بس الجفن طبكه..
موطك سني طك اعضامي مابي صوت..
وصارت طيحتي جن طيحت الوركة…
ذكرتك والدمع سولف الخدي سنين..
وعلى طرف الجفن جن غيمة متعلكة…
الضاع بزغره صدر امه بخياله يعيش..
واليضيع بحرب تشتاك اله التفكة…
اليزعل واليحب يدللون هواي…
الشبه بيناتهم روحين محتركة…
المتواعد وفاته الموعد وماجاي…
تلكه اعله الدرب نظراته متعلكة…
امنسولف بيك احس بصفي تطلع نار..
وتخيل لحدمن واصلة الحركة…
اليتوضه بخجل عنده اليحب معصوم…
وساعات العبادة سوالف الفركة…
على زودك علك شديت ادي تذكار..
كلت الشافهن بصمة محب يلكه..
وسالتك عالزراك البيك اجاك منين..
كتلي امن البرد؟؟ كتلك اثر شبكة..
وياي تعاندت واني ادري كلش زين..
مو من البرد من الحضن زركه..
عرفت تخوني من صار طولك سيف…
ونسيت الخالق هم خالق الدركة…
شهكت سوالفك حجيك ترس ديوان..
سوالف مو الي ماطلعن بحركة..
تعال بداعة الشيب الطلع بجفاك…
موتدري الكبر خنكه….
الكبر من يبجي لازم مشتهي الملكه..
الاهي بداعتك كافي…
الاهي اتعب الفركة..
الاهي سوالفه ابالي…
اليحب موبالجمر جلمات التحركة…
على طرف النفس زارع خلك بي طول..
مثل خلك امي من طاح العمر وركة..
على جفنك سهر بي حلم شابع موت…
حلم شايب مكمط روحة مختنكة..
حاجيت الخذاك سوالفي ونساك..
كتلة العفته كلش خلصت خلكة..
كتله اعله البرد جنت اني المدفيك..
كتله بشوكنه جنه الهوى نحركه..
كتله اكلوبنه جبناها بالايجار..
شحجيت وياه كلي وجذبك مصدكه..
حلفان الجرح لوطعنة لوسجين..
وحلفان الحبيب وداعة الفركة..
كلبك جان فارغ هسه لابي خير..
جنت تحلم تحب بس هسه تستنكه..
يمر طيفك وفز بس الكه غيري وياك…
ويسالوني وكلهم كل شي ما الكه