علي سلمان غالي
لا تشِدّه الليله مجنون الجرح
جرحي من ينشد يعاند شي عجيب
آنه وي جرحي مثل ليل وصبح
هو جاري بس غريب بصف غريب
وجرحي ليلية يِذر روحه ملح
حتى ليلية يطگ بيّه لهيب
تموت كلها وهو يرفض مايموت
لان من يموت معناهه يطيب
آنه وي جرحي فرد شغله عجيبه
بروحي ياكل بس اگله انت حبيب
بيّه عايش صرت أحسنّه أخوي
وهو مامره يِِِحس بيّه قريب
بيّه طيب بكثر مابيه من قساوه
وبيه قساوه بكثر مابيّه آنه طيب
يبتسم لو شافني منّه الوب
ويزعل امن ايشوفني أنخه طبيب
مدري حظي الما گعد حتى ويه جرحي
مدري صار الجرح همْ قسمه ونصيب
ولاتطيب … ظل مثل ما انت بيَه
هيج آلا مي عليّه…طگ نزيف
اثگل اِشما ردت تثگل لاتخاف
فوگ هذا الالم تگدر بعد ضيف
انت ضيفي والمهم تكون راضي
لان گبلك آنه مازعلتْ ضيف
آنه من انضاف ممنون اطي روحي
اتريد ني ابخل على ضيفي بنزيف
هذا آنه وطبّعت طبعي عليّه
روّضت آلامي كلهه وصرت سيف
واضح وگلبي على لساني هو يه
وماصرت فد يوم للظالم حليف
آنه احب الناس گد ما بيّه حيل
وآنه ما انكر فضل كسره رغيف
آنه ماحب اليسولف عل النظافة
وهو يدري بنفسه اصلاً مو نظيف
آنه ماحب اليسولف عل ديانه
وهو فاتح گلبه للدينه مضيف
آنه مو ويه اليسولف عل عداله
وهو لابس للظلم تاج الوصيف
آنه ضد اللي ثبرنه بوطنية
وهو بايگ حتى احلام الرصيف
آنه ضد روحي اذا مره شفتني
مأيد الظالم على حساب الضعيف
بيّه نهر من القناعة وما أخاف
ولو كل وكتي يمر بيّه خريف
آنه ضحيت بأسم گوه بنيته
وعفت شهره بكل گلب الهه رفيف
مامدحت الظالم وسيفه اعلى نحري
سقط هو وآنه ظل ثوبي نظيف
آنه كلش اعتذر عن كلمة آنه
كررتها هواي بس قصدي شريف
ما اريد أمدح بأنه
ولا اريد افخر بآنه
لان ماريد أحچي اعلى غيري
گمت آنه احچي اعلى آنه
