أيمن الزركاني
يسـألوني وكلهم بالغلط مطعـون
لاگيلك عذر ما حـاجة تتعـذر
من كل كـتر انزف لا تگـلي اثـنيــن
انه بكل صـفنه منك طلـــعت خنجـر
الك كل العذر من طحت ما شـلت أيــد
چفك منخلــق لــوداع مـو أكــثر
جـنازة ومكـبرة وصوت أم ولد مكتول
أفــز كــابوس گـلي ومحـد أيفسـر
عشرتي ويه الزمن طلقة بحضن شاجور
ما تعرف سراهه الهــسه بس تنطـر
رسمتك جو مسية وشجرة يمهه أطـيور
ونفس الورقة گتلـك هاك وتصـور
راسملـي گبر مليان دم أتــريد
اگولـن عاطفـي وأتقــبل المنظـر
مو تاجر بضاعة وحتى أعوض الراح
ولهيهه أبجگارة الـروح من تخـسر
ما حاجة وطعنـتك من تهـد بالنار
بس انوي الكلب من وحـده يتكـسر
صح طحنه سوه بس نختلف بالموت
بينه النيـته مـوت وبينه يتحضـر
العاين عالجثـث ميز الـراد أيمـوت
دمه أشگد نزف بس تلگه وجهه اصفر
عش گلب اليحب شايل محـنه وطيـب
مـرات الهـوه لـو مره يتفـطـر
مـو دخان يطلـع من قطـار أيروح
گلوب الناس هـاي الصعدت أتبخـر
