زمـــــن الحركــــانــــي
حقك تزعل انته الذنب موبيك
الگبلك گتله هم ماياخذ الراي
وموشرط افتهمني الراسه متروس
هوه متروس راسه ويعزف الناي
گطعت اچفوفي خاف أتسلم أعليك
وبعد ميهمني جاي بدربي ماجاي
وإذا ناوي انته ترحل عالاقل گول
اقل شي حتى أجيب اچفوفي وياي
شنو فضلك علي من غير الجروح
تريد بذيچ أذكرك رايد بهاي
من انكسر غصني وعندك أجناح
الغربان اجت يمي وانته ماجاي
أعديهن چنت چانن قليلات
بس هسه السوالف صارن أهواي
أذكرك مدري أنصحك حاير وياك
تريد احچيلك العندي بصراحه
إذا تمل صوت واحد لا تكتبه
لان بالورقه هم تسمع أصياحه
بصف مخنوك لا تتنفس بصوت
لان صوت النفس يسلب الراحه
قطار الذاكره يطلّع بالإعزاز
ويجيب أجروح ماعده استراحه
الخاطر كلبي اعوفك حتى يرتاح
اليودع الرمح يرتاحن اصفاحه
اليعطش دنيه عاف الخاطر الماي
هيج انه من أعوفك عدي راحه
