المايندل مچانه يتيه ..

من يحچون عن الهور

ألما فرزن صفنتي أنساه

ما شايف سلف مهجور

الگمر لو صار بس اهلال ..

 يمكن تايه بنجمه

ابنادم لو حچه بلا راي ..

 هذا مفارگ بقسمه

المناغي نجم ومسولف بوردات

تتعنه الشمس جدمه

المسافر والدموع متاع ..

 هذا يغازل الغيمة

العوسج بي طعم عشاگ ..

 بس يعيش بالهيمه

المسولف كل حرف نعناع

متوضي بحضن گمره

المطشر نده ونجمات ..

 هذا اشتاگ لمرايه

المجابل حچي الديوان ..

هذا اشتاگ لحچايه

دلوني بطريج الليل ..

عندي اسوالف احچيها

روازين السلف تغتاظ ..

 لو مامش دفو اعليها

الخايف من صدى الحيطان

لا يدنه اعل فزعت ناي

المودع نفس يم راگ ..

ليش يعيش عمره بماي

الظافرلك گصايب طين ..

 ما مشتاگ للحنه

السكران بعطر مگفاك ..

 هذا ايتيه بالجنه

المناطر اهلال العيد ..

بس الصادق بصومه

الفرزن كل هوه بدخان ..

هذا مقدس بنومه

ناذر لو يهل طرواك ..

ابديلك عمر نوحين

واتبختر

وانثرلك تراچي ازلوف مذبوحه

وشعلك شمع بچفوفي من أسهر

تعبت الگناطر من صفنتي عليك

 واتونس .. ضواها الحار برسومي

تعال اقنت يسالوفة عشگ دفني

تعال أمطر علي بشفاك خل أسكر

وراودني الگمر بجفاك بيه يعيل

يشمر شامته اعل الليل

ويهلهل ضوه بكل گاع ..

 ما شافت ترافت ظلّ

ويتركني بحلگ شيطان 

رخص روحه حتى يشوف

وانته بعيد

مليت الهجر يفلان ..

وانته بواهسك يعگوب

مالك نيه للرجعه

طشيت السوالف ماي

بلكي تشوفلك عبره

ومتانيك طيف بنوم ..

 واتعناني صفنة ريل

ومشابگ نده وردات

وسوالف حمد بيهن

ومتانيك